മാഹി: കുട്ടികൾക്കും വൃദ്ധജനങ്ങൾക്കും വേണ്ടി ജില്ലാ പഞ്ചായത്ത് നിർമിച്ച എം.മുകുന്ദൻ പാർക്ക് മേയ് ഒന്നിനു തുറന്നു കൊടുക്കും. പറശിനിക്കടവ് വിസ്മയ പാർക്ക് സംരംഭകരായ എംടിഡിസിക്കാണ് പാർക്കിന്റെ നടത്തിപ്പ് ചുമതല. പാർക്കിലേക്കുള്ള പ്രവേശനത്തിന് 50 രൂപയാണ് ഫീസ്. കുട്ടികൾക്കും വൃദ്ധജനങ്ങൾക്കും നിരക്കിൽ ഇളവുണ്ട്. വൈകുന്നേരം അഞ്ചു മുതലായിരിക്കും പാർക്കിൽ പ്രവേശനം. ഉദ്ഘാടനത്തിന്റെ ഭാഗമായി നടക്കുന്ന സാംസ്കാരിക സമ്മേളനം എഴുത്തുകാരൻ എം. മുകുന്ദൻ ഉദ്ഘാടനം ചെയ്യും. തുടർന്ന് ഗസൽ സന്ധ്യയും നടക്കും.
പാർക്ക് ഉദ്ഘാടനവുമായി ബന്ധപ്പെട്ട് സംഘാടക സമിതി രൂപീകരിച്ചു. ന്യൂമാഹി പഞ്ചായത്ത് സാംസ്കാരിക നിലയത്തിൽ നടന്ന സംഘാടക സമിതി രൂപീകരണത്തിന് ജില്ലാപഞ്ചായത്ത് പ്രസിഡന്റ് പി.പി. ദിവ്യ അധ്യക്ഷത വഹിച്ചു.