കണ്ണൂർ: സംസ്ഥാനത്ത് ഭവനരഹിതരും ഭൂരഹിതരും ഇല്ലാത്ത സാഹചര്യമൊരുക്കുകയാണ് സംസ്ഥാന സർക്കാരിന്റെ ലക്ഷ്യമെന്ന് മന്ത്രി കെ. രാജൻ. ചൊക്ലി ഓഫീസ് കോൺഫറൻസ് ഹാളും സ്റ്റാഫ് ക്വാർട്ടേഴ്സും ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ഇതിനായി പട്ടയത്തിന്റെ ഡാഷ് ബോർഡ് തയാറാക്കിയിരിക്കുകയാണ്. പട്ടയം ലഭിക്കുന്നതിന് കിട്ടിയിട്ടുള്ള അപേക്ഷകൾ, അത് തീർപ്പാക്കാൻ കഴിയാത്തതിനുള്ള കാരണം, പട്ടയം നൽകുന്നതിനു വേണ്ട നടപടികൾ, ആവശ്യമെങ്കിൽ ചട്ടങ്ങളിൽ വരുത്തേണ്ട മാറ്റം തുടങ്ങിയ വിവരങ്ങളെല്ലാം ഉൾപ്പെടുന്ന ഡാഷ് ബോർഡ് ആണ് തയാറാക്കിയത്. സംസ്ഥാനത്തെ എല്ലാവരെയും ഭൂമിയുടെ ഉടമകളാക്കാനാവശ്യമായ ഭൂനിയമം നടപ്പാക്കും. എല്ലാമാസവും മൂന്നാമത്തെ വെള്ളിയാഴ്ച വില്ലേജ് ജനകീയസമിതികൾ ചേരുമെന്നും മന്ത്രി പറഞ്ഞു.