ബസ് ചാർജ് വർധനയുമായി ബന്ധപ്പെട്ടു കുരുക്കിലായ സർക്കാർ, വീണ്ടും നിരക്കു വർധന സംബന്ധിച്ച ചാർട്ട് തയാറാക്കാൻ നിർദേശം. കെഎസ്ആർടിസി ഫാസ്റ്റ് പസഞ്ചർ മുതലുള്ള സൂപ്പർ ക്ലാസ് ബസുകളിലെ നിരക്കു വർധനയിലെ ആശയക്കുഴപ്പവും നിയമക്കുരുക്കും ഒഴിവാക്കിയുള്ള പുതുക്കിയ ചാർട്ട് തയാറാക്കാനാണ് ഉന്നത ഉദ്യോഗസ്ഥർക്കു ഗതാഗത മന്ത്രി നൽകിയിട്ടുള്ള നിർദേശം.
രണ്ടു ദിവസത്തിനകം റിപ്പോർട്ട് നൽകണം. അവ്യക്തത ഒഴിവാക്കുന്നതും നിയമപരമായി നിലനിൽക്കുന്നതുമായ നിരക്കു വർധന പട്ടിക തയാറാക്കി സമർപ്പിക്കാനായിരുന്നു മുഖ്യമന്ത്രി നിർദേശിച്ചിരുന്നത്. നേരത്തെ തയാറാക്കി നൽകിയ പട്ടിക അനുസരിച്ചു വർധന നടപ്പാക്കിയാൽ രാജ്യത്തെ ഏറ്റവും വലിയ ബസ് ചാർജുള്ള സംസ്ഥാനമായി കേരളം മാറുമെന്ന അഭിപ്രായവും ഉയർന്നിരുന്നു.