മാഹി: സ്ത്രീകൾക്ക് ഡ്രൈവിംഗ് ടെസ്റ്റ് ഉൾപ്പെടെയുള്ള വാഹനസംബന്ധമായ എല്ലാ സേവനങ്ങളും ലഭ്യമാക്കുവാനുള്ള പദ്ധതിക്കായി മാഹിയിൽ പിങ്ക് ഡേ നടപ്പാക്കുമെന്ന് പുതുച്ചേരി ഗതാഗതമന്ത്രി ചന്ദ്ര പ്രിയങ്ക പറഞ്ഞു. മാഹിയിൽ രണ്ടു ദിവസത്തെ സന്ദർശനത്തിനെത്തിയ മന്ത്രി മാധ്യമപ്രവർത്തകരുമായി സംസാരിക്കുകയായിരുന്നു. ശനിയാഴ്ചകളിൽ മാഹിയിൽ സർക്കാർ ഓഫീസുകൾ അവധിയാണെങ്കിലും ഇനിമുതൽ മോട്ടോർ വാഹന വകുപ്പിന്റെ ഓഫീസുകൾ വനിതകളുടെ സേവനത്തിനായി തുറന്നുപ്രവർത്തിക്കും. പുതുച്ചേരിയിൽ നേരത്തെ ഈ പദ്ധതി നടപ്പാക്കിയിട്ടുണ്ടെന്നും മന്ത്രി അറിയിച്ചു.ഓട്ടോകൾക്ക് താത്കാലിക പെർമിറ്റ് നൽകും. കേന്ദ്രഫണ്ട് ലഭ്യമാകുന്ന മുറയ്ക്ക് കാലപ്പഴക്കം നേരിടുന്ന പുതുച്ചേരി-മാഹി ബസ് പിൻവലിച്ച് പുതിയ ബസ് ഈ റൂട്ടിൽ സർവീസ് നടത്തുമെന്നും മന്ത്രി പറഞ്ഞു.