സ്‌ത്രീകളുടെയും കുട്ടികളുടെയും ട്രാൻസ്‌ജെൻഡേഴ്‌സിന്റെയും തുല്യതയും സാമൂഹ്യ ഉന്നമനവും ലക്ഷ്യമിട്ട്‌ ജെൻഡർ ബജറ്റ്‌. ഇക്കുറി ജെൻഡർ ബജറ്റിനുള്ള അടങ്കൽ തുക 4665.20 കോടിയായി ഉയർത്തി. ഇത്‌ സംസ്ഥാനത്തിന്റെ ആകെ പദ്ധതിവിഹിതത്തിന്റെ 20.90 ശതമാനമാണ്‌. നിലവിലുള്ളവ തുടരുന്നതിനു പുറമെ സ്‌ത്രീകൾക്കും കുട്ടികൾക്കും ട്രാൻസ്‌ജെൻഡർമാർക്കും സാമൂഹ്യ സുരക്ഷ ഉറപ്പാക്കാൻ പുതിയ 16 പദ്ധതി തുടങ്ങും.
വനിതാ ശാക്തീകരണത്തിന്‌ 14 കോടി
വനിതാ ശാക്തീകരണത്തിന്‌ 14 കോടി രൂപ വകയിരുത്തി. സ്‌ത്രീകൾക്കും പെൺകുട്ടികൾക്കും നേരെയുള്ള അതിക്രമം തടയാനുള്ള നിർഭയ പദ്ധതിക്ക്‌ ഒമ്പതു കോടിയും ജെൻഡർപാർക്ക്‌ പ്രവർത്തനങ്ങൾക്ക്‌ പത്തു കോടിയും ലിംഗാവബോധ പ്രവർത്തനങ്ങൾക്ക്‌ ഒരു കോടിയും അനുവദിച്ചു.
അവർ അനാഥരാകില്ല
കോവിഡ്‌മൂലം അച്ഛനമ്മമാർ നഷ്ടമായ കുട്ടികളെ സഹായിക്കാനുള്ള സമഗ്ര പുനരധിവാസ പാക്കേജിന്‌ രണ്ടു കോടിയും ഇടുക്കിയിൽ ചിൽഡ്രൻസ്‌ ഹോം ആരംഭിക്കാൻ 1.30 കോടിയും വകയിരുത്തി.
ജെൻഡർ ബജറ്റ്‌; ഉറപ്പാക്കും തുല്യത ; അടങ്കൽ തുക 4665.20 കോടി
