കണ്ണൂർ: ജില്ലയിലെ ദേശീയപാതാ വികസനവുമായി ബന്ധപ്പെട്ട് പ്രാദേശിക തലത്തിൽ ഉയരുന്ന പ്രായോഗിക പ്രശ്‌നങ്ങൾ പരിഹരിക്കാൻ ദേശീയപാത അഥോറിറ്റി (എൻഎച്ച്എഐ) തയാറാകണമെന്ന് ജില്ലയിലെ എംഎൽഎമാർ ആവശ്യപ്പെട്ടു. എൻഎച്ച്-66 വികസനം സംബന്ധിച്ച് ജില്ലാ കളക്ടർ എസ്. ചന്ദ്രശേഖറിന്‍റെ അധ്യക്ഷതയിൽ ചേർന്ന അവലോകന യോഗത്തിലാണ് എംഎൽഎമാർ ഇക്കാര്യം ഉന്നയിച്ചത്.
കളക്ടറുടെ ചേംബറിലും തത്‌സമയം ഓൺലൈനിലുമായാണ് യോഗം ചേർന്നത്. ദേശീയ പാതാ വികസനവുമായി ബന്ധപ്പെട്ടുയർന്ന ഗൗരവകരമായ പ്രശ്‌നങ്ങൾ പരിഗണിക്കാമെന്ന് എൻഎച്ച്എഐ അധികൃതർ ഉറപ്പ് നൽകി. എംഎൽഎ മാരായ കെ.പി. മോഹനൻ, സജീവ് ജോസഫ് എന്നിവർ ചേംബറിലും രാമചന്ദ്രൻ കടന്നപ്പള്ളി, എം.വിജിൻ എന്നിവർ ഓൺലൈനായും സംബന്ധിച്ചു. ദേശീയ പാത വികസനവുമായി ബന്ധപ്പെട്ട വിവിധ ഉദ്യോഗസ്ഥരും യോഗത്തിൽ പങ്കെടുത്തു.