കണ്ണൂർ: സര്വകലാശാലയുടെ വരുമാനം വര്ധിപ്പിക്കുന്നതിന് വിദ്യാര്ഥികളുടെ എണ്ണം വര്ധിപ്പിക്കാനും ഇതിനായി കൂടുതല് സീറ്റുകള് അനുവദിക്കാനും ഇന്നലെ ചേര്ന്ന പ്രത്യേക സിന്ഡിക്കേറ്റ് യോഗം തീരുമാനിച്ചു. ആഡ്ഓണ് കോഴ്സുകളും, ഓണ്ലൈന് കോഴ്സുകളും ആരംഭിക്കും. സര്വകലാശാല പ്രസിദ്ധീകരണങ്ങള്, വിദ്യാഭ്യാസ ചാനല് എന്നിവ വഴിയും വരുമാനം വര്ധിപ്പിക്കും. സര്വകാലാശാലയുടെ ഓഡിറ്റോറിയങ്ങളും കെട്ടിടങ്ങളും ആദായം ഉണ്ടാക്കും വിധം പൊതു ആവശ്യങ്ങള്ക്ക് വാടകയ്ക്ക് നല്കും. വിദ്യാര്ഥികള്ക്കായി എന്ഡോവ്മെന്റ് സ്കോളര്ഷിപ്പ് ആരംഭിക്കും. യൂനിവേഴ്സിറ്റി ഇന്നൊവേഷന് സോണ് ആരംഭിക്കാനും തീരുമാനിച്ചു.
സര്വകലാശാലയുടെ വരുമാനം വര്ധിപ്പിക്കുന്നതിന് വിവിധ നിര്ദേശങ്ങള്ക്ക് യോഗം അംഗീകാരം നല്കി. 2022- 23 സാമ്പത്തിക വര്ഷത്തെ ബജറ്റും പാസാക്കി. . വൈസ് ചാന്സലര് പ്രൊഫ. ഗോപിനാഥ് രവീന്ദ്രന് അധ്യക്ഷത വഹിച്ചു. ഉന്നത വിഭ്യാഭ്യാസ സെക്രട്ടറി സി. അജയന്, പ്രൊ. വൈസ് ചാന്സലര് പ്രൊഫ. എ. സാബു, രജിസ്ട്രാര് പ്രൊഫ. ജോബി കെ. ജോസ് സിന്ഡിക്കേറ്റ് അംഗങ്ങള് തുടങ്ങിയവര് പങ്കെടുത്തു.