കണ്ണൂർ: ജയിലുകൾ മാനസിക പരിവർത്തനത്തിനുള്ള കേന്ദ്രങ്ങളാണെന്ന് മന്ത്രി എം.വി. ഗോവിന്ദൻ പറഞ്ഞു. കണ്ണൂർ സ്പെഷൽ സബ് ജയിലിൽ ജയിൽ ക്ഷേമദിനാഘോഷങ്ങളുടെ സമാപന പരിപാടിയായ സ്നേഹോത്സവത്തിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. ജയിൽമോചിതരായി പോകുന്ന അന്തേവാസികളെ നന്മയുടെ പാതയിലേക്ക് നയിക്കാൻ പ്രചോദനമാവും വിധം ഓരോ മാവിൻ തൈ സമ്മാനമായി നൽകുന്ന നന്മമരം പദ്ധതി, ജയിലിലെ എല്ലാ സെല്ലുകളിലേക്കുമുള്ള ടെലിവിഷൻ സംവിധാനത്തിന്റെ സ്വിച്ച് ഓൺ കർമം, രണ്ടാംഘട്ട മത്സ്യകൃഷിയുടെ ഭാഗമായുള്ള മത്സ്യകുഞ്ഞുങ്ങളുടെ നിക്ഷേപിക്കൽ, വൈദ്യുതി ബോർഡുമായി ചേർന്നുള്ള സോളാർ-സൗരപദ്ധതിയുടെ ഉദ്ഘാടനം എന്നിവയും മന്ത്രി നിർവഹിച്ചു. കെ.വി. സുമേഷ് എംഎൽഎ അധ്യക്ഷത വഹിച്ചു. ഗായകൻ കണ്ണൂർ ഷരീഫ് മുഖ്യാതിഥിയായി. കോർപറേഷൻ സ്ഥിരം സമിതി അധ്യക്ഷ പി. ഇന്ദിര, സ്പെഷൽ സബ്ജയിൽ സൂപ്രണ്ട് ടി.കെ. ജനാർദനൻ, സെൻട്രൽ ജയിൽ സൂപ്രണ്ട് റോമിയോ ജോൺ, റീജണൽ വെൽഫെയർ ഓഫീസർ കെ.വി. മുകേഷ്, ജില്ലാ ജയിൽ സൂപ്രണ്ട് കെ. വിനോദൻ, സബ്ജയിൽ സൂപ്രണ്ട് ഐ.വി. ഒതേനൻ, കെജെഇഒഎ സംസ്ഥാന സെക്രട്ടറി പി.ടി. സന്തോഷ്, സംസ്ഥാന കമ്മിറ്റി അംഗം കെ.ടി. അരുൺ പങ്കെടുത്തു.
previous post