ഇരിട്ടി: കര്ണാടകത്തിലെ മാക്കൂട്ടം ബ്രഹ്മഗിരി വന്യജീവി സങ്കേതത്തില് നിന്നും കേരളത്തിലെ അതിര്ത്തി പ്രദേശങ്ങളായ ജനവാസ മേഖലയിലേക്ക് കാട്ടാന ഇറങ്ങുന്നത് തടയുന്നതിന് പേരട്ട, തൊട്ടില് പാലം കൂട്ടുപുഴ ഭാഗങ്ങളില് 1.2 കിലോമീറ്റര് സോളാര് ഫെന്സിംഗ് സ്ഥാപിക്കുന്നതിനുള്ള ടെന്ഡര് നടപടികള് ഈയാഴ്ച പൂര്ത്തിയാക്കും. ജനാവസ മേഖലയായ പെരിങ്കരിയില് കാട്ടാന യുവാവിനെ ചവിട്ടി കൊന്നതിനെ തുടര്ന്ന് ഉയര്ന്ന ജനരോക്ഷം കണക്കിലെടുത്താണ് നടപടി ശക്തമാക്കിയത്. രണ്ടുമാസത്തിനുള്ള ഇവിടങ്ങളിലെല്ലാം ഫെന്സിംഗ് പൂര്ത്തിയാക്കും. തൊട്ടില് പാലം മുതല് പേരട്ട ടൗണ് വരെയുള്ള 2.50 കിലോമീറ്റര് ഫെന്സിംഗ് പൂര്ത്തിയായി. അവശേഷിക്കുന്ന പേരട്ട ടൗണ് മുതല് കൂട്ടുപുഴ വരെയുള്ള ഭാഗമാണ് രണ്ടു മാസത്തിനുള്ളില് സോളാര് ഫെന്സിംഗിന്റെ നിയന്ത്രണത്തിലാക്കുക.
ബ്രഹ്മഗിരി സംരക്ഷണ വനമേഖലയില് നിന്നും പേരട്ട, തൊട്ടില് പാലം വഴിയാണ് ആനക്കൂട്ടം അതിര്ത്തി കടന്ന് എത്തുന്നത്. കഴിഞ്ഞ ദിവസം മേലെ പെരിങ്കരിയില് എത്തിയ കാട്ടാന ജസ്റ്റിന് എന്ന യുവാവിനെ കുത്തിക്കൊന്നിരുന്നു. കൂട്ടം തെറ്റിയെത്തിയ കൊമ്പനാണ് ജനവാസ മേഖലയില് എത്തിയത്. കാട്ടാന പ്രതിരോധ സംവിധാനം ഇല്ലാത്ത പേരട്ട ടൗണിനോട് ചേര്ന്നുള്ള അതിര്ത്തി പ്രദേശത്തു കൂടിയാണ് ആന എത്തിയതെന്നാണ് വനം വകുപ്പിന്റെ നിഗമനം. കണ്ണൂര് ഡിഎഫ്ഒ കാര്ത്തിക്, തളിപ്പറമ്പ് റേഞ്ചര് വി. രതീശന്, കൊട്ടിയൂര് റേഞ്ചര് സുധീര് നരോത്ത്, ഫോറസ്റ്റര്മാരായ കെ. ജിജില്, സുന്ദരന് എന്നിവരുടെ നേതൃത്വത്തില് മേഖലയില് പരിശോധന നടത്തി. സജീവ് ജോസഫ് എംഎല്എ അതിര്ത്തിയിലെ പ്രതിരോധ സംവിധാനങ്ങളെക്കുറിച്ച് വനം വകുപ്പ് ഉദ്യോഗസ്ഥരുമായി ചര്ച്ചയും നടത്തി.