കെ റെയില്‍ പദ്ധതി 2025 ഓടെ പദ്ധതി പൂര്‍ത്തിയാക്കാനാണ് ലക്ഷ്യമെന്നും പദ്ധതി യാഥാര്‍ഥ്യമാകുന്നതോടെ സംസ്ഥാന വികസനത്തില്‍ വന്‍ കുതിച്ചുചാട്ടമാണ് സംഭവിക്കുകയെന്നും കേരള റെയില്‍ ഡവലപ്‌മെന്‍റ് കോര്‍പറേഷന്‍ ലിമിറ്റഡ് എംഡി വി. അജിത്കുമാർ.
കേരള മാനേജ്‌മെന്‍റ് അസോസിയേഷന്‍ സംഘടിപ്പിച്ച ലീഡര്‍ ടോക്‌സില്‍ “കെ റെയില്‍ ദി സില്‍വര്‍ലൈന്‍ പ്രോജക്ട് ഓഫ് കേരള’ എന്ന വിഷയത്തില്‍ സംസാരിക്കുകയായിരുന്നു അദ്ദേഹം.
63,941 കോടി രൂപയാണ് ചെലവ് പ്രതീക്ഷിക്കുന്നത്. തിരുവനന്തപുരം മുതല്‍ കാസര്‍ഗോഡ് വരെ ഇരട്ടപ്പാതയുള്ള പദ്ധതിയില്‍ 200 കിലോമീറ്റര്‍ വേഗതയിലാണ് ട്രെയിനുകള്‍ സഞ്ചരിക്കുക.
സംസ്ഥാനത്തെ 11 ജില്ലകളിലൂടെ കടന്നുപോകുന്ന കെ റെയിലിന് 11 സ്റ്റേഷനുകളാണ് ഉണ്ടാവുക. 530.6 കിലോമീറ്റര്‍ ദൈര്‍ഘ്യം നാലു മണിക്കൂറില്‍ താഴെ പൂര്‍ത്തിയാക്കാനാവും. ഇരുഭാഗത്തേക്കും 37 വീതം ട്രെയിനുകള്‍ ഓടും. തിരക്കുള്ള സമയങ്ങളില്‍ 20 മിനിറ്റിനുള്ളില്‍ ഒരു സര്‍വീസ് ഉണ്ടാകും.
കെ റെയില്‍ നിര്‍മാണം മൂലം പ്രളയസാധ്യതകളും മറ്റു പ്രകൃതി ദുരന്തങ്ങളും ഉണ്ടാവുമെന്ന പ്രചാരണങ്ങള്‍ അസ്ഥാനത്താണെന്ന് അജിത്കുമാര്‍ പറഞ്ഞു. പദ്ധതിയുടെ സ്ഥലമെടുപ്പിന് 13,000 കോടി രൂപയാണ് അനുവദിച്ചിരിക്കുന്നത്.
ആദ്യഘട്ട സ്ഥലമെടുപ്പ് ആരംഭിച്ചു. പദ്ധതി വരുന്നതോടെ കേരളത്തിലെ യാത്രാവഴികള്‍ മാറുമെന്നാണ് കണക്കാക്കുന്നതെന്നും അദ്ദേഹം പറഞ്ഞു.