കൊട്ടിയൂര്‍: മാനന്തവാടി -മട്ടന്നൂര്‍ വിമാനത്താവള പാതയുടെ ഭാഗമായി വരുന്ന കൊട്ടിയൂർ -ബോയ്സ്ടൗണ്‍ -പാല്‍ച്ചുരം റോഡിൻെറ ശോച്യാവസ്ഥ പരിശോധിക്കാന്‍ കേരള റോഡ് ഫണ്ട് ബോര്‍ഡ് അധികൃതര്‍ സന്ദർശനം നടത്തി. മഴമാറിയാല്‍ ഉടന്‍ റോഡ് അറ്റകുറ്റപ്പണി നടത്തി ഗതാഗത യോഗ്യമാക്കുമെന്ന് ഇവർ അറിയിച്ചു. അതിനുശേഷം വിമാനത്താവള പാതയുമായി ബന്ധപ്പെട്ട് ഈ റോഡിൻെറ പദ്ധതി റിപ്പോര്‍ട്ട് സമര്‍പ്പിക്കും. മട്ടന്നൂരില്‍ നിന്നാരംഭിക്കുന്ന നാലുവരിപ്പാത പാല്‍ച്ചുരം റോഡെത്തുമ്പോള്‍ രണ്ടുവരിയാകുമെന്നും ഉദ്യോഗസ്ഥര്‍ പറഞ്ഞു. കേരള റോഡ് ഫണ്ട് ബോര്‍ഡ് കണ്ണൂര്‍ അസി. എക്സിക്യൂട്ടിവ് എൻജിനീയര്‍മാരായ പി. സജിത്ത്, പി.കെ. റോജി എന്നിവരുടെ നേതൃത്വത്തിലാണ് പരിശോധന നടത്തിയത്. അമ്പായത്തോട് മുതല്‍ ബോയ്സ്ടൗണ്‍ വരെയാണ് ഉദ്യോഗസ്ഥര്‍ പരിശോധന നടത്തിയത്.
കൊട്ടിയൂർ -വയനാട് ചുരം പാത: ഉദ്യോഗസ്ഥർ പാൽച്ചുരം റോഡ് സന്ദർശിച്ചു
