അതിര്‍ത്തി കടക്കാന്‍ ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് നിര്‍ബന്ധമാക്കിയ കര്‍ണാടക സര്‍ക്കാരിന്‍റെ നടപടിക്കെതിരേ തലപ്പാടി അതിര്‍ത്തിയില്‍ കടുത്ത പ്രതിഷേധം. ഇന്നലെ പുലര്‍ച്ചെ മുതല്‍ത്തന്നെ കര്‍ണാടക അധികൃതര്‍ തലപ്പാടിയടക്കം കാസര്‍ഗോഡ് ജില്ലയുമായുള്ള ഏഴ് അതിര്‍ത്തികളും അടച്ച് ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് ഉള്ളവരെ മാത്രമാണ് കടത്തിവിട്ടത്.
നൂറുകണക്കിന് ആളുകളെയാണ് നെഗറ്റീവ് സര്‍ട്ടിഫിക്കറ്റ് ഇല്ലാത്തതിന്‍റെ പേരില്‍ തടഞ്ഞുനിര്‍ത്തിയത്. ഇതേത്തുടര്‍ന്ന് മംഗളുരുവില്‍ ജോലിചെയ്യുന്ന മലയാളികള്‍ പോലീസുമായി വാക്കുതര്‍ക്കത്തില്‍ ഏര്‍പ്പെട്ടു. പ്രതിഷേധം കനത്തതോടെ യാത്രക്കാര്‍ 15 മിനിറ്റോളം ദേശീയപാത ഉപരോധിച്ചു.
ആംബുലന്‍സുകളെയും മംഗളൂരു സര്‍വകലാശാല സെമസ്റ്റര്‍ പരീക്ഷയെഴുതുന്ന വിദ്യാര്‍ഥികളെയും മാത്രമാണ് കടത്തിവിട്ടത്. ശനിയാഴ്ചയാണ് കര്‍ണാടക സര്‍ക്കാര്‍ കേരളം, മഹാരാഷ്ട്ര സംസ്ഥാനങ്ങളിലുള്ള യാത്രക്കാര്‍ക്കായി പുതിയ മാര്‍ഗനിര്‍ദേശം പുറപ്പെടുവിച്ചത്. ഇതുപ്രകാരം രണ്ടു ഡോസ് വാക്‌സിന്‍ എടുത്തവര്‍ പോലും അതിര്‍ത്തി കടക്കണമെങ്കില്‍ 72 മണിക്കൂറെങ്കിലും മുമ്പെടുത്ത ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് ഹാജരാക്കണം.
മുമ്പ് തലപ്പാടിയില്‍ കര്‍ണാടക നടത്തിയിരുന്ന കോവിഡ് പരിശോധനയും നിര്‍ത്തിവച്ചിരിക്കുകയാണ്. ഇവിടെ കോവിഡ് പരിശോധനയ്ക്കുള്ള സൗകര്യമൊരുക്കി തങ്ങള്‍ക്ക് യാത്രാനുമതി നല്‍കണമെന്നും അല്ലാത്തപക്ഷം തങ്ങളുടെ ഉപജീവനമാര്‍ഗം ഇല്ലാതാകുമെന്നും മംഗളൂരുവിനെ ആശ്രയിച്ചു കഴിയുന്ന മലയാളികള്‍ പറയുന്നു. അതേസമയം ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് ഇല്ലാത്ത ഒരാളെപ്പോലും കടത്തിവിടില്ലെന്നും അതിര്‍ത്തിയില്‍ കൂടുതല്‍ പോലീസിനെ വിന്യസിക്കുമെന്നും ദക്ഷിണ കന്നഡ ഡെപ്യൂട്ടി കമ്മീഷണര്‍ കെ.വി.രാജേന്ദ്ര പറഞ്ഞു.
തലപ്പാടി അതിര്‍ത്തിയില്‍ ഹൈവേ ഉപരോധിച്ച് ജനങ്ങളുടെ പ്രതിഷേധം
