കണ്ണൂർ: സാങ്കേതികവിദ്യ അനുദിനം വികസിക്കുന്ന സാഹചര്യത്തില്‍ അധ്യാപനരീതിയും അതിനനുസരിച്ച് മാറണമെന്നും മാനുഷികമുഖം നഷ്ടപ്പെടാത്ത തരത്തില്‍ ഈ മാറ്റം കാലഘട്ടം ആവശ്യപ്പെടുന്നുണ്ടെന്നും പൊതുവിദ്യാഭ്യാസ മന്ത്രി വി. ശിവന്‍കുട്ടി. കണ്ണൂര്‍ സര്‍വകലാശാലയുടെ വിദ്യാഭ്യാസ പഠനവകുപ്പായ സ്‌കൂള്‍ ഓഫ് പെഡഗോഗിക്കല്‍ സയന്‍സും ജില്ലാപഞ്ചായത്തും സംയുക്തമായി സംഘടിപ്പിച്ച സ്ലൈഡ് (സ്‌പെഷല്‍ ലേണിംഗ് ഇന്‍ ഡിജിറ്റല്‍ എഡുക്കേഷന്‍) പരിശീലന പരിപാടിയുടെ ഉദ്ഘാടനം ഓണ്‍ലൈനായി നിര്‍വഹിച്ചു പ്രസംഗിക്കുകയായിരുന്നു മന്ത്രി.
സര്‍വകലാശാലകള്‍ വിജ്ഞാന ഉത്പാദന കടമ നിര്‍വഹിക്കുന്നതിനൊപ്പം സാമൂഹ്യമേഖലയിലും നിരന്തര ഇടപെടല്‍ നടത്തണമെന്ന സന്ദേശമാണ് കണ്ണൂര്‍ സര്‍വകലാശാലയും ജില്ലാപഞ്ചായത്തും സംഘടിപ്പിക്കുന്ന സ്ലൈഡ് പരിശീലനപദ്ധതി മുന്നോട്ടുവയ്ക്കുന്നത്. പഠനത്തിനു വേണ്ട അടിസ്ഥാനസൗകര്യങ്ങള്‍ ഒരുക്കുന്നതിനൊപ്പം വിദ്യാഭ്യാസ പരിശീലനത്തിന്‍റെ പുതിയൊരു പാതയാണ് സ്ലൈഡ് മുന്നോട്ടുവയ്ക്കുന്നതെന്നും മന്ത്രി പറഞ്ഞു.
കോവിഡ് പശ്ചാത്തലത്തില്‍ ഡിജിറ്റല്‍ പ്ലാറ്റ്‌ഫോം ടൂളുകളെ പരിചയപ്പെടുത്തി ഓണ്‍ലൈന്‍ വിദ്യാഭ്യാസത്തിന്‍റെ നൂതന സാങ്കേതികവിദ്യയിലും പുതിയ വിദ്യാഭ്യാസരീതിയിലും അധ്യാപകരെ പ്രാപ്തരാക്കുകയാണ് പരിശീലനത്തിന്‍റെ ലക്ഷ്യം. ജില്ലാ പഞ്ചായത്തിനു കീഴിലെ തെരഞ്ഞെടുക്കപ്പെട്ട 150 ഹൈസ്‌കൂള്‍-ഹയര്‍ സെക്കൻഡറി അധ്യാപകര്‍ക്കാണ് ആദ്യഘട്ടത്തില്‍ പരിശീലനം നല്‍കുന്നത്. തുടര്‍ പ്രക്രിയയായി കൂടുതല്‍ അധ്യാപകരെ പരിശീലിപ്പിക്കും. രണ്ടു ദിവസങ്ങളില്‍ നാലു സെഷനുകളായാണ് പരിശീലനം സംഘടിപ്പിക്കുന്നത്. കേന്ദ്ര സര്‍വകലാശാലയിലെയും വിവിധ കോളജുകളിലെയും വിദഗ്ധ അധ്യാപകരാണ് പരിശീലനത്തിന് നേതൃത്വം നല്‍കുന്നത്.
ജില്ലാ പഞ്ചായത്ത് മിനി ഹാളില്‍ നടന്ന ചടങ്ങില്‍ ജില്ലാ പഞ്ചായത്ത് പ്രസിഡന്‍റ് പി.പി. ദിവ്യ അധ്യക്ഷയായിരുന്നു. വൈസ് ചാന്‍സലര്‍ പ്രഫ. ഗോപിനാഥ് രവീന്ദ്രന്‍, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍, സ്ഥിരംസമിതി അധ്യക്ഷന്മാരായ കെ.കെ. രത്‌നകുമാരി, വി.കെ. സുരേഷ് ബാബു, ജില്ലാ പഞ്ചായത്തംഗങ്ങളായ സി.പി. ഷിജു, തോമസ് വെക്കത്താനം, സ്‌കൂള്‍ ഓഫ് പെഡഗോഗിക്കല്‍ സയന്‍സ് മേധാവി ഡോ. ആര്‍.കെ. ജയപ്രകാശ്, ആര്‍ഡിഡി പി.എന്‍. ശിവന്‍, ഡിഡിഇ മനോജ് മണിയൂര്‍, ഡയറ്റ് പ്രിന്‍സിപ്പല്‍ കെ.വിനോദ് കുമാര്‍, ഡിപിഒ പി.വി. പ്രദീപന്‍, ടി.പി. അശോകന്‍, വി.ചന്ദ്രന്‍ തുടങ്ങിയവര്‍ പ്രസംഗിച്ചു. വിവിധ വിദ്യാഭ്യാസ വകുപ്പ് പ്രതിനിധികള്‍ പങ്കെടുത്തു.
അധ്യാപന രീതി സാങ്കേതികവിദ്യയ്ക്കൊപ്പം മാറണം: മന്ത്രി ശിവന്‍കുട്ടി
