ഭരണങ്ങാനം: വിശുദ്ധ അൽഫോൻസാമ്മയുടെ തിരുനാളിന് അൽഫോൻസാ തീർഥാടന കേന്ദ്രത്തിൽ ഇന്നു കൊടിയേറും. അൽഫോൻസാമ്മയുടെ സ്വർഗപ്രാപ്തിയുടെ 75-ാം വാർഷികദിനമെന്ന പ്രത്യേകത ഈ വർഷത്തെ തിരുനാളിനുണ്ട്.
രാവിലെ 10.45നു പാലാ ബിഷപ് മാർ ജോസഫ് കല്ലറങ്ങാട്ട് തിരുനാൾ കൊടിയേറ്റും. തുടർന്നു മാർ ജേക്കബ് മുരിക്കൻ വിശുദ്ധ കുർബാന അർപ്പിച്ച് സന്ദേശം നൽകും. ദിവസവും രാവിലെ 5.30, 6.45, 8.00, 11.00, ഉച്ചകഴിഞ്ഞു മൂന്ന്, അഞ്ച് എന്നീ സമയങ്ങളിൽ വിശുദ്ധ കുർബാന ഉണ്ടായിരിക്കും. വൈകുന്നേരം അഞ്ചിനുള്ള വിശുദ്ധ കുർബാനയ്ക്കുശേഷം ജപമാല പ്രാർഥന നടത്തും. കോവിഡ് നിയന്ത്രണങ്ങൾക്കു വിധേയമായി വിശ്വാസികൾക്ക് പങ്കെടുക്കാം. ഓണ്‍ലൈൻ വഴി എല്ലാ തിരുക്കർമങ്ങളും ലൈവായി പ്രക്ഷേപണം ചെയ്യും. ഇന്നു മുതൽ 28 വരെ ഷാലോം ടിവിയിൽ രാവിലെ 6.30നും ഷെക്കെയ്‌ന ടിവിയിൽ രാവിലെ എട്ടിനും വിശുദ്ധ കുർബാന സംപ്രേഷണം ചെയ്യും.
https://youtube. com/ c/StAlphonsaShrine, https://youtube. com/ c/Palai RoopathaOfficial എന്നീ യൂട്യൂബ് ചാനലിലും alphonsa.org എന്ന വെബ്സൈറ്റിലൂടെയും അൽഫോൻസാ തീർഥാടന കേന്ദ്രത്തിലെ തിരുക്കർമങ്ങളിൽ തൽസമയം പങ്കെടുക്കാം.