അതിരമ്പുഴ കാരിസ് ഭവനിലെ പ്രശസ്ത വചനപ്രഘോഷകനും എംഎസ്എഫ്എസ് വൈദികനുമായ ഫാ.അനീഷ് മുണ്ടിയാനിക്കൽ (40) അന്തരിച്ചു. കോവിഡ് ബാധിതനായി ചികിത്സയിലായിരുന്ന അദ്ദേഹം പുലർച്ചെ 1.30-നാണ് മരിച്ചത്. സംസ്കാരം വ്യാഴാഴ്ച ഉച്ചകഴിഞ്ഞ് രണ്ടിന് കാരിസ് ഭവനിൽ ആരംഭിച്ച് എസ്എഫ്എസ് സെമിനാരിയിൽ നടക്കും.
1980 നവംബർ എ‌ട്ടിന് ആനിക്കാട് ജനിച്ച അദ്ദേഹം പിന്നീട് കുടുംബത്തോടൊപ്പം തലശേരി അതിരൂപതയിലുള്ള കാർത്തികപുരത്തേക്ക് താമസം മാറ്റി. കോഴിക്കോട് സർവകലാശാലയിൽനിന്ന് ബിരുദം നേടിയ ശേഷമാണ് 2001-ൽ ഏറ്റുമാനൂർ എസ്എഫ്എസ് സെമിനാരിയിൽ അദ്ദേഹം ചേർന്നത്.
2006-ൽ കാരിസ്ഭവനിൽ ഒരുവർഷത്തെ റീജൻസി നടത്തിയശേഷം ദൈവശാസ്ത്രപഠനം ബംഗളൂരു തേജസ്‌ വിദ്യാപീഠത്തിൽ പൂർത്തീകരിച്ച് 2010 ഡിസംബർ 30-ന് പട്ടം സ്വീകരിച്ചു. തൃശൂർ കണ്ടശ്ശാംകടവ് സെന്‍റ് മേരീസ് ഫൊറോനാപള്ളിയുടെ അസുദേന്തിയായി ഒരു വർഷം സേവനം ചെയ്തശേഷം ആറ് മാസം അണക്കര സെന്‍റ് തോമസ് ഫൊറോനാ പള്ളിയിൽ അസുദേന്തിയായും മരിയൻ ധ്യാനകേന്ദ്രത്തിലും സേവനം ചെയ്തു. പിന്നീട് 2012 ൽ കാരിസ്ഭവനിൽ എത്തി.
കാരിസ്ഭവനിലും വെളിയിലും വിദേശരാജ്യങ്ങളിലും അച്ചൻ ശുശ്രൂഷകളിലൂടെ നിറസാന്നിധ്യമായിരുന്നു. ജീവിതവിശുദ്ധിക്കും പ്രാർഥനയ്ക്കും ശ്രദ്ധ നൽകിക്കൊണ്ട് ആത്മാവിൽ ജ്വലിച്ചു കർത്താവിന് ശുശ്രൂഷകൾ ചെയ്യുന്നതിന് അച്ചൻ മാതൃകയായി. വചനപ്രഘോഷണം, കൗണ്‍സിലിംഗ് ശുശ്രൂഷ, ഫോണിലൂടെ പ്രാർത്ഥന, ഉപദേശം എന്നിവയിലൂടെ അനേകരുമായി ആത്മീയബന്ധം പുലർത്താൻ അച്ചനു കഴിഞ്ഞു.
എസ്എഫ്എസ് സഭയുടെ സൗത്ത്-വെസ്റ്റ് പ്രൊവിൻസിൽ മിഷൻ ഫോറം പ്രോഗ്രാമിന് ചുക്കാൻ പിടിക്കാനും കാരിസ്ഭവന്‍റെ മുഖപത്രമായ കാരിസ്ജ്യോതി മാസികയുടെ ചീഫ് എഡിറ്ററായും പ്രവർത്തിച്ചു.