ഇരിട്ടി: മലയോര മേഖലയില് കോവിഡ് വ്യാപനം വര്ധിക്കുന്ന സാഹചര്യത്തില് തദ്ദേശ സ്ഥാപനങ്ങളുടെ നേതൃത്വത്തില് മുന്നൊരുക്കങ്ങള് ഊര്ജിതമാക്കി. ആറളം പഞ്ചായത്തില് പുനരധിവാസ മേഖലയിലുള്ളവര്ക്കായി വെളിമാനം ഗേള്സ് ട്രൈബല് ഹോസ്റ്റലും ജനറല് വിഭാഗത്തിനായി സെന്റ് സെബാസ്റ്റ്യന് ഹയര് സെക്കന്ഡറി സ്കൂളും ഒരുക്കി. എഫ്എല്ടിസികളും സജ്ജമാക്കിയിട്ടുണ്ട്.
ഇരിട്ടി മേഖലയില് കോവിഡ് വ്യാപനം ആശങ്ക ഉയര്ത്തി വര്ധിക്കുകയാണ്. കൂടുതല് ഇരിട്ടി നഗരസഭയിലാണ്. സമാനമായ രീതിയില് പായം, ആറളം പഞ്ചായത്തുകളിലും രോഗികളുടെ എണ്ണം വര്ധിക്കുകയാണ്. ആറളം ഫാം പുനരധിവാസ മേഖലയില് രോഗികളുടെ എണ്ണം വര്ധിക്കുമ്പോഴും പരിശോധന നിരക്ക് ഉയര്ത്തുന്നില്ലെന്ന് ആക്ഷേപമുണ്ട്. പഞ്ചായത്തിലെ ടെസ്റ്റ് പോസിറ്റിവിറ്റി നിരക്ക് 36 ശതമാനമാണ്. ഈ സാഹചര്യത്തിലാണ് വെളിമാനം ഗേള്സ് ട്രൈബല് ഹോസ്റ്റല് ആറളം പുനരധിവാസ മേഖലയിലുള്ളവര്ക്കായി 32 കിടക്കകളോടെ ഒരുക്കിയത്. ജനറല് വിഭാഗത്തിനായി വെളിമാനം സെന്റ് സെബാസ്റ്റ്യന് ഹയര് സെക്കന്ഡറി സ്കൂളും സജ്ജമാക്കിയിട്ടുണ്ട്.
പായം, ഉളിക്കല്, അയ്യന്കുന്ന്, പടിയൂര്, മുഴക്കുന്ന് തുടങ്ങി എല്ലാ പഞ്ചായത്തുകളിലും എഫ്എല്ടിസികളും സജ്ജമാണ്. നിയന്ത്രണങ്ങളോടൊപ്പം ടെസ്റ്റുകളും വര്ധിപ്പിക്കാനുള്ള നടപടികള് ആരോഗ്യവകുപ്പിന്റെ നേതൃത്വത്തില് നടക്കുന്നുണ്ട്. കോവിഡ് ആശുപത്രിയായി മാറ്റിയ ഇരിട്ടി താലൂക്ക് ആശുപത്രിയിലെ മുഴുവന് ബെഡുകളും നിറഞ്ഞു.
രോഗവ്യാപനം തടയാന് പോലീസ് നടപടിയും മേഖലയില് ശക്തമാക്കിയിട്ടുണ്ട്. ഇന്നു മുതല് ലോക്ഡൗണ് ആയതിനാല് ഇന്നലെ ഇരിട്ടിയിലും മലയോര ടൗണുകളിലും വന് ജനത്തിരക്കായിരുന്നു.