കണ്ണൂർ: കോവിഡ് വ്യാപനം രൂക്ഷമായിക്കൊണ്ടിരിക്കുകയാണ്. അതുകൊണ്ട് തന്നെ അണുബാധയുടെ ലക്ഷണങ്ങൾ മുമ്പത്തേതിൽ നിന്ന് വിചിത്രവും അസാധാരണവും ആയി മാറുന്ന സാഹചര്യമാണുള്ളത്. എത്ര ചെറിയ ലക്ഷണങ്ങളാണ് ഉള്ളതെങ്കിൽ പോലും നാം അതീവ ജാഗ്രത പുലർത്തേണ്ടതാണ്.
ശ്രദ്ധിക്കേണ്ട സാധാരണ ലക്ഷണങ്ങൾ
മുൻ ഘട്ടത്തിൽ നിന്നും വ്യത്യസ്തമായി പരിവർത്തനം വന്ന കൊറോണ വൈറസിന്റെ രണ്ടാം തരംഗ വ്യാപനത്തിവുമായി ബന്ധപ്പെട്ട് ഉണ്ടാകാൻ സാധ്യതയുള്ള ചില രോഗലക്ഷണങ്ങൾ ഏതെല്ലാമാണെന്ന് അറിയാം:
1. തൊണ്ടവേദന: തൊണ്ടയുടെ ഭാഗത്തായി ചൊറിച്ചിൽ അല്ലെങ്കിൽ എന്തെങ്കിലും തരത്തിൽ വീക്കം അനുഭവപ്പെടുന്നത് കോവിഡ്-19 അണുബാധയുടെ പ്രധാന ലക്ഷണങ്ങളിൽ ഒന്നായി കണക്കാക്കപ്പെടുന്നുണ്ട്. ആഗോളതലത്തിൽ ഇതുവരെ നടത്തപ്പെട്ട മുഴുവൻ കോവഡ് പരിശോധനകളുടെ അടിസ്ഥാനത്തിൽ 52% കേസുകളിലും ഈയൊരു ലക്ഷണം പ്രധാനമായും കണ്ടുവരുന്നുണ്ട് എന്ന് കണക്കാക്കിയിരിക്കുന്നു.
2. ക്ഷീണം: കോവിഡ് ബാധിതരായ എല്ലാ രോഗികളും തന്നെ പ്രാരംഭ ലക്ഷണങ്ങളിലൊന്നായി ചൂണ്ടിക്കാണിക്കുന്നതാണ് ശരീരത്തിന് അനുഭവപ്പെടുന്ന ബലഹീനതയും ക്ഷീണവും തളർച്ചയും ഒക്കെ. കൊറോണ വൈറസ് ബാധ ടെസ്റ്റ് ചെയ്ത് സ്ഥിതികരിക്കുന്നതിന് മുൻപ് തന്നെ ഭൂരിഭാഗം രോഗികളും തങ്ങൾക്ക് കഠിനമായ ക്ഷീണത്തിന്റെയും ബലഹീനതയുടെയും ലക്ഷണങ്ങൾ അനുഭവപ്പെട്ടതായി റിപ്പോർട്ട് ചെയ്യുന്നുണ്ട്.
3. ശരീരവേദന: കോവിഡ് രോഗബാധ സ്ഥിതികരിച്ച വ്യക്തികൾക്കെല്ലാം തന്നെ കഠിനമായ ശാരീരിക വേദന, സന്ധികളിൽ വേദന, പേശി വേദന എന്നിവ ഒരു പ്രധാന ലക്ഷണമായി അനുഭവപ്പെടുന്നുണ്ടെന്ന് ആരോഗ്യവിദഗ്ധർ വെളിപ്പെടുന്നു. ശരീരത്തിലെ പ്രധാനപ്പെട്ട പേശികളിലെ ടിഷ്യു ലൈനിംഗുകളെ കൊറോണ വൈറസ് ആക്രമിക്കുന്നതിന്റെ ഫലമായാണ് ഇതുണ്ടാവുന്നത്. അതുകൊണ്ടുതന്നെ ചെറുതാണെങ്കിൽ പോലും ശാരീരിക വേദനകൾ അനുഭവപ്പെടുന്നുണ്ടെങ്കിൽ ഉടനടി പരിശോധനയ്ക്ക് വിധേയമാക്കുക.
4. പനിയും ജലദോഷവും: പനിയോടൊപ്പം ശരീരത്തിന് കഠിനമായ രീതിയിൽ തണുപ്പ് അനുഭവപ്പെടുന്നുണ്ടെങ്കിൽ വൈറസ് ബാധിച്ചതിന്റെ സൂചനയായിരിക്കാം. അസാധാരണമായ രീതിയിൽ കഠിനമായ ജലദോഷം അനുഭവപ്പെടുന്നതും വൈറസിന്റെ ലക്ഷണങ്ങളിൽ ഉൾപ്പെടും.
5. ഓക്കാനം, ഛർദ്ദി: ഓക്കാനം, ഛർദ്ദി എന്നിവ കോവിഡ് -19 അണുബാധയുടെ ആദ്യഘട്ടത്തിലെ പ്രഥമ ലക്ഷണങ്ങളായി കണക്കാക്കപ്പെടുന്നവയാണ്. രണ്ടാം ഘട്ടത്തിൽ ഇതും പ്രധാനപ്പെട്ട ലക്ഷണങ്ങളുടെ പട്ടികയിൽ ഉൾപ്പെടുന്നുണ്ട്.
6. തലകറക്കം: തലകറക്കം, ക്ഷീണം, മാനസിക അസ്വാസ്ഥ്യം, തുടങ്ങിയ ന്യൂറോളജിക്കൽ ലക്ഷണങ്ങൾ പലതും ഇപ്പോൾ കോവിഡ് -19 അണുബാധയുടെ പ്രാരംഭലക്ഷണങ്ങൾ ആയി ചൂണ്ടിക്കാണിക്കപ്പെടുന്നുണ്ട്. രാജ്യത്തിനകത്തും പുറത്തുമായി കോവിഡ് ബാധിതരായ പലരും ഇത്തരം ലക്ഷണങ്ങൾ റിപ്പോർട്ട് ചെയ്യുന്നുണ്ട്.
ഇതോടൊപ്പം ചില അസാധാരണ ലക്ഷണങ്ങളും
മേല്പറഞ്ഞ ലക്ഷണങ്ങളോടൊപ്പം, ഇനി പറയുന്ന അസാധാരണ ലക്ഷണങ്ങൾ ഉണ്ടെങ്കിൽ അവയും ശ്രദ്ധയോടെ നിരീക്ഷിക്കേണ്ടതുണ്ട്. കൺജക്റ്റിവിറ്റിസ് (പിങ്ക് ഐ), കേൾവിക്കുറവ്, ചെവി വേദന, ദഹനനാളത്തിന്റെ തകരാറുകൾ, രുചിയും മണവും ഇല്ലാതാകുന്നത് എന്നിവ ചില അസാധാരണ ലക്ഷണങ്ങളാണ്.
ചുവന്ന കണ്ണുകൾ (pink eyes):
കണ്ണുകൾ ചുവന്ന് വരുന്നത് ശ്രദ്ധയിൽ പെട്ടാൽ ഉടൻ തന്നെ വൈദ്യ സഹായം ലഭ്യമാക്കണം. കൂടാതെ കണ്ണുകളുടെ വീക്കം, കണ്ണുകളിൽ നിന്ന് വെള്ളം വരുന്നത് എന്നിവയൊക്കെ കൊറോണവൈറസ്സിന്റെ പുതിയ ലക്ഷണങ്ങളായി കാണേണ്ടതുണ്ട്.
ഉമിനീർ ഉൽപാദനം കുറയുന്നത് (dry mouth):
നിങ്ങളുടെ വായിൽ കൃത്യമായ അളവിൽ ഉമിനീർ ഉത്പാദിപ്പിക്കപ്പെടുന്നത് നല്ല രീതിയിലുള്ള ദഹനത്തിന് ഏറ്റവും അത്യാവശ്യമാണ്. മാത്രമല്ല ഉമിനീർ ഉൽപാദനം ഒരു പരിധി വരെ മോശം ബാക്ടീരിയകളിൽ നിന്ന് വായയെ സംരക്ഷിക്കുമെന്ന് ആരോഗ്യവിദഗ്ധർ വിശ്വസിക്കുന്നു. നിങ്ങളുടെ വായിലെ ഉമിനീർ ഉൽപാദനം കുറയുന്നത് കോവിഡിൻ്റെ മാറ്റം വന്ന പുതിയ ലക്ഷണങ്ങളിൽ ഒന്നായി കണക്കാക്കപ്പെടുന്നു. ഇത്തരത്തിൽ അനുഭവപ്പെടുമ്പോൾ ആളുകൾക്ക് ഭക്ഷണം ചവയ്ക്കുന്നതിനും ശരിയായി സംസാരിക്കുന്നതിനും ഒക്കെ ബുദ്ധിമുട്ട് ഉളവാകുന്നത് തിരിച്ചറിയാം.
കൊവിഡ് ടംഗ് (COVID Tongue):
ലണ്ടനിലെ കിംഗ്സ് കോളേജിലെ ഒരു പഠനം പറയുന്നത് കോവിഡ് രോഗബാധിതരായ അഞ്ചിൽ ഒരാൾക്ക് എന്ന കണക്കിൽ ഇപ്പോഴും ഈ പട്ടികയിൽ ഉൾപ്പെടാത്ത മറ്റു പല ലക്ഷണങ്ങളും പ്രകടമാകുന്നുണ്ട് എന്നാണ്. ഇതുകൂടാതെ കോവിഡ് ബാധിച്ചാൽ ചിലരുടെ മോണയിലും നാക്കിലും വ്രണങ്ങൾ കണ്ടു വരുന്നുണ്ട് എന്നും റിപ്പോർട്ടുകൾ ഉണ്ട്. കോവിഡ് ടംഗ് എന്ന പേരിലാണ് ഇതിപ്പോൾ അറിയപ്പെടുന്നത്. നാക്കിന്റെ നിറം മാറുകയും ചർമത്തിൽ തിണർപ്പ് ഉണ്ടാവുന്നതും മറ്റൊരു ലക്ഷണമാണ്.
മേൽപ്പറഞ്ഞ വിധത്തിൽ ഏതെങ്കിലും രോഗലക്ഷണങ്ങൾ നിങ്ങളിൽ പ്രകടമാകുന്നുണ്ടെങ്കിൽ സ്വയം ഹോം ക്വാറൻ്റെൻ സ്വീകരിച്ച് വീട്ടിൽ തന്നെ തുടരുകയും ആവശ്യമെങ്കിൽ പരിശോധനയ്ക്ക് വിധേയമായി രോഗബാധിതമാണോ എന്ന് ഉറപ്പാക്കേണ്ടതുമാണ്.