കോവിഡ്‌ വ്യാപനം രൂക്ഷമായി തുടരുന്ന സാഹചര്യത്തിൽ പ്രധാനമന്ത്രി നരേന്ദ്ര മോദിക്ക് കത്തയച്ച് മുൻ പ്രധാനമന്ത്രി ഡോ. മൻമോഹൻ സിംഗ്. കോവിഡ്‌ വാക്സിനേഷൻ വർധിപ്പിക്കണമെന്നത് അടക്കം അഞ്ചിന നിർദേശങ്ങൾ ഉൾപ്പെടുത്തിയാണ് മുൻ പ്രധാനമന്ത്രി കത്തയച്ചത്. ആറു മാസത്തിനുള്ളിൽ എത്ര വാക്സിൻ കുത്തിവയ്പുകൾ നടത്തുമെന്നത് പ്രസിദ്ധപ്പെടുത്തണം.
വാക്സിനുകൾ സംബന്ധിച്ച് സംസ്ഥാനങ്ങൾക്ക് കൃത്യവും സുതാര്യവുമായ വിവരങ്ങൾ നൽകണം. വാക്സിനേഷനുള്ള മാനദണ്ഡം നിശ്ചയിക്കാനുള്ള അവകാശം സംസ്ഥാനങ്ങൾക്ക് നൽകണം. 45 വയസിൽ താഴെയുള്ളവർക്ക് അടിയന്തരമായി വാക്സിനേഷനുള്ള തീരുമാനമെടുക്കാൻ സംസ്ഥാന ആരോഗ്യ വകുപ്പ് അധികൃതർക്ക് കഴിയുന്ന വിധത്തിൽ ചട്ടങ്ങളിൽ ഇളവ് നൽകണം- തുടങ്ങിയ നിർദേശങ്ങളും മുന്നോട്ടുവയ്ക്കുന്നു.