ഇരിട്ടി: പായം പഞ്ചായത്തിലെ കുന്നോത്ത് ബെൻഹിലിൽ ആദിവാസികൾക്ക് പതിച്ച് നൽകിയ പ്രദേശത്തോട് ചേർന്ന് ക്രഷറിന് അനുമതി നൽകിയതിനെതിരേ ജനകീയ കർമസമിതിയുടെ നേതൃത്വത്തിൽ പായം പഞ്ചായത്ത് ഓഫീസിലേക്ക് മാർച്ച് നടത്തി.
കഴിഞ്ഞ ദിവസം കുന്നോത്ത്- ബെൻഹിൽ റോഡ് നാട്ടുകാർ ഉപരോധിച്ചിരുന്നു. പ്രദേശത്തെ ഇരുപത്തഞ്ചോളം ആദിവാസി കുടുംബങ്ങൾക്ക് പതിച്ചുനൽകിയ ഭൂമിയോട് ചേർന്നാണ് ക്രഷറിന് അനുമതി നൽകിയിരിക്കുന്നത്. ക്രഷറിന് ലൈസൻസ് കിട്ടുന്നതിനായി പ്രദേശത്തെ ആദിവാസിയുടെ വീട് മണ്ണുമാന്തി യന്ത്രങ്ങൾ ഉപയോഗിച്ച് തകർത്തത് വിവാദമായിരുന്നു. ഇതിനുപിന്നാലെയാണ് നാട്ടുകാർ പ്രതിഷേധവുമായി രംഗത്തെത്തിയത്. സ്ത്രീകളും കുട്ടികളും ഉൾപ്പെടെയുള്ളവർ സമരത്തിനിറങ്ങിയതോടെ പ്രതിഷേധം ശക്തമായി.
പഞ്ചായത്ത് ഓഫീസ് മാർച്ച് പരിസ്ഥിതി പ്രവർത്തകൻ നോബിൾ പൈകട ഉദ്ഘാടനം ചെയ്തു. കർമസമിതി ചെയർമാൻ കെ.കുഞ്ഞിരാമൻ അധ്യക്ഷത വഹിച്ചു. ബ്ലോക്ക് കോൺഗ്രസ് കമ്മിറ്റി പ്രസിഡന്റ് തോമസ് വർഗീസ്, ടി.പി. സജീവൻ, മൂര്യൻ രവീന്ദ്രൻ, ജോർജ് വർഗീസ്, ജെസി വെള്ളറയിൽ എന്നിവർ പ്രസംഗിച്ചു.
previous post