എക്കലും ചെളിയും മൂലം നീരൊഴുക്ക് തടസപ്പെട്ട പെരിയാറിന്റെ കൈവഴികള്‍ ശുചീകരിച്ച് ആഴം കൂട്ടുന്ന ഓപ്പറേഷന്‍ വാഹിനി പദ്ധതി പുരോഗമിക്കുകയാണെന്ന് മന്ത്രി പി രാജീവ് അറിയിച്ചു. പെരിയാറിന്റെ കൈവഴികളില്‍ നിന്ന് 3,62,966 ഘന മീറ്റര്‍ എക്കലും ചെളിയും ഇതുവരെ നീക്കം ചെയ്‌തെന്ന് മന്ത്രി വ്യക്തമാക്കി.
ആലങ്ങാട് ബ്ലോക്കില്‍ ഉള്‍പ്പെട്ട കൈവഴികളില്‍ നിന്ന് 2,48,203 ഘന മീറ്റർ എക്കലും ചെളി നീക്കം ചെയ്തു. 26 യന്ത്രങ്ങളാണ് ആലങ്ങാട് ബ്ലോക്കില്‍ ശുചീകരണത്തിനായി പ്രവര്‍ത്തിപ്പിക്കുന്നത്. പാറക്കടവ് ബ്ലോക്കില്‍ 41,879 ഘന മീറ്ററും ഏലൂര്‍- കളമശേരി നഗരസഭകളിലായി 2,380 ഘനമീറ്റര്‍ എക്കലും ചെളിയും ഇതിനകം നീക്കം ചെയ്തു.