ഇനി തീവണ്ടി യാത്രയ്ക്കിടയിൽ പുസ്തകം വായിക്കണമെന്ന് തോന്നിയാൽ അത് നിങ്ങളുടെ സീറ്റിലെത്തും. പുസ്തകം മാത്രമല്ല, ഭക്ഷണമോ സൗന്ദര്യവർധക വസ്തുക്കളോ എന്തുമാവട്ടെ മൊബൈൽ ആപ്പ് വഴി ആവശ്യപ്പെട്ടാൽ മതി.ടിക്കറ്റിതര വരുമാനം കണ്ടെത്തുകയാണ് ലക്ഷ്യം.
കോച്ചുകളിൽ വൈഫൈ സൗകര്യവും ഉണ്ടാവും. മുംബൈ-വാരാണസി മഹാനഗരി എക്സ്പ്രസിലാണ് ഈ മൊബൈൽ ആപ്പ് ആദ്യം പരീക്ഷിക്കുന്നത്.
റെയിൽവേ ബോർഡിന്റെ അംഗീകാരം ലഭിച്ചതോടെ മധ്യ റെയിൽവേയുടെ മുംബൈ ഡിവിഷൻ പദ്ധതി നടപ്പാക്കാനുള്ള ടെൻഡർ നടപടികളിലേക്ക് കടന്നിരിക്കുകയാണ്.
യാത്രക്കാരന് റെയിൽവേ സ്റ്റേഷനിലെത്താനും തീവണ്ടിയിറങ്ങിയ ശേഷം ലക്ഷ്യസ്ഥാനത്തേയ്ക്ക് പോകാനും ആപ്പ് വഴി വാഹനങ്ങൾ ബുക്ക് ചെയ്യാം. ശൗചാലയവും കമ്പാർട്ട്മെന്റുകളും വൃത്തിയാക്കാനും ആപ്പ് വഴി ആവശ്യപ്പെടാം.