രാജ്യത്ത്‌ ഏറ്റവും കുറവ്‌ മാതൃമരണം കേരളത്തിലെന്ന്‌ റിപ്പോർട്ട്. ശനിയാഴ്ച പുറത്തുവന്ന രജിസ്ട്രാർ ജനറൽ ഓഫ്‌ ഇന്ത്യയുടെ 2017–-2019 വർഷത്തെ കണക്കിലാണിതുള്ളത്. ഒരു ലക്ഷം കുഞ്ഞുങ്ങൾ ജനിക്കുമ്പോൾ എത്ര അമ്മമാർ മരിക്കുന്നു എന്ന കണക്കാണ്‌ മാതൃമരണ അനുപാതം. 2017–-2019ൽ സംസ്ഥാനത്തെ അനുപാതം വെറും 30 ആണ്‌. 2015–-17ൽ 43 ആയിരുന്നു. ദേശീയ അനുപാതം 103ആണ്‌.
അസം (205), ഉത്തർപ്രദേശ്‌ (167), മധ്യപ്രദേശ്‌ (163), ഛത്തീസ്‌ഗഢ്‌ (130), രാജസ്ഥാൻ (141) തുടങ്ങി പത്ത്‌ സംസ്ഥാനം ദേശീയ ശരാശരിക്കും മുകളിലാണ്‌. ദക്ഷിണേന്ത്യൻ സംസ്ഥാനങ്ങളിൽ ഏറ്റവും കൂടുതൽ മരണം കർണാടകത്തിലാണ്(83). ആഗോളതലത്തിൽ അനുപാതം 7-0 ആക്കുകയാണ് യുഎന്നിന്റെ ലക്ഷ്യം.
2020ൽ അനുപാതം 30ൽ എത്തിക്കാനായിരുന്നു കേരളത്തിന്റെ ശ്രമം. എന്നാൽ, ഒരു വർഷം മുമ്പുതന്നെ അത്‌ നേടാനായി. സംസ്ഥാനത്തെ മാതൃമരണ നിരക്ക് വെറും 1.4 ശതമാനമാണ്‌. 15നും 49നും ഇടയിൽ പ്രായമുള്ള ലക്ഷം അമ്മമാരിൽ റിപ്പോർട്ട് ചെയ്യുന്ന മരണനിരക്കാണ്‌ മാതൃമരണ നിരക്ക്.
ദേശീയ നിരക്ക് 6.5 ശതമാനമാണ്‌. കോവിഡ്‌ വ്യാപന വർഷങ്ങളായിരുന്ന 2020ലും 2021ലും ഗർഭിണികൾക്ക്‌ കൂടുതൽ ശ്രദ്ധയും ആരോഗ്യപരിചരണവും ഉറപ്പാക്കാൻ കേരളത്തിനായിട്ടുണ്ട്‌.