തിരുവനന്തപുരം∙ പെൻഷൻ പ്രായം വർധിപ്പിക്കുന്നത് സംബന്ധിച്ച് ഇതുവരെ ചർച്ച നടന്നിട്ടില്ലെന്ന് ധനമന്ത്രി കെ.എൻ.ബാലഗോപാൽ. കിഫ്ബി യോഗ തീരുമാനങ്ങൾ വിശദീകരിക്കാനായി വിളിച്ച വാർത്താ സമ്മേളനത്തിൽ സംസാരിക്കുകയായിരുന്നു മന്ത്രി.പെൻഷൻ പ്രായം സംബന്ധിച്ച് പല നിർദേശങ്ങളും ഉണ്ടെന്നും അതൊന്നും ചർച്ച ചെയ്തിട്ടില്ലെന്നും മന്ത്രി പറഞ്ഞു. ചെലവു ചുരുക്കൽ നിർദേശങ്ങൾ ചിലത് ബജറ്റിലൂടെ നടപ്പിലാക്കും. ബുദ്ധിമുട്ടുകൾ തരണം ചെയ്യാനാണ് ശ്രമിക്കുന്നത്. മുഖ്യമന്ത്രിയുടെ അധ്യക്ഷതയിൽ ചേർന്ന യോഗത്തിൽ 6943.37 കോടി രൂപയുടെ 44 പുതിയ പദ്ധതികൾക്ക് ധനാനുമതി നൽകിയതായി മന്ത്രി പറഞ്ഞു. ഇതോടെ, 70,762 പദ്ധതികൾക്കാണ് കിഫ്ബി ഇതുവരെ അനുമതി നൽകിയത്.