ദക്ഷിണാഫ്രിക്കയിലും മറ്റു രാജ്യങ്ങളിലും കോവിഡിന്റെ പുതിയ വകഭേദം കണ്ടെത്തിയെന്ന വാർത്തകൾക്കു പിന്നാലെ ക്രൂഡ് ഓയിൽ വില കുത്തനെ താഴോട്ട്. ഒരുദിവസം കൊണ്ട് 9 ഡോളർ കുറഞ്ഞ് ബ്രെന്റ് ക്രൂഡ് വില 72 ഡോളറിലെത്തി.
കോവിഡ് വ്യാപന ആശങ്കകളെ തുടർന്ന് പല രാജ്യങ്ങളും യാത്രാവിലക്ക് ഏർപ്പെടുത്തിയതും ക്രൂഡ് വിലയെ സ്വാധീനിച്ചിട്ടുണ്ട്. കരുതൽ ശേഖരം ഉപയോഗിക്കാൻ അമേരിക്കയും ഇന്ത്യയും തീരുമാനിച്ചതിനു പിന്നാലെ 82 ഡോളറിലേക്ക് വില ഉയർന്നത് 2 ദിവസം മുൻപായിരുന്നു. കഴിഞ്ഞ 2 മാസമായി 80 ഡോളറിനടുത്തുണ്ടായിരുന്ന ക്രൂഡ് വിലയാണ് കോവിഡ് ഭീഷണിയെ തുടർന്ന് താഴ്ന്നത്.