കണ്ണൂർ: കണ്ണൂര്‍ ജില്ലയില്‍ നിന്ന് കര്‍ണാടകയിലേക്കുള്ള അന്തര്‍സംസ്ഥാന പാതയിലെ യാത്രാ നിയന്ത്രണം ഒഴിവാക്കണമെന്ന് ജില്ലാ വികസന സമിതി യോഗം ആവശ്യപ്പെട്ടു. അതിര്‍ത്തി പ്രദേശത്തെ കുടിയിറക്ക് പ്രശ്‌നം പരിഹരിക്കണമെന്നും യോഗം ആവശ്യപ്പെട്ടു. സണ്ണി ജോസഫ് എംഎല്‍എ, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍ എന്നിവരാണ് ഈ വിഷയം ഉന്നയിച്ചത്.
യാത്രാ നിയന്ത്രണം കുടക് ജില്ലാ ഭരണകൂടം വീണ്ടും നീട്ടിയിരിക്കുകയാണെന്ന് സണ്ണിജോസഫ് എംഎല്‍എ ചൂണ്ടിക്കാട്ടി. നിലവില്‍ കെഎസ്ആര്‍ടിസി ബസുകള്‍ക്ക് മാത്രമാണ് യാത്രാനുമതി നല്‍കിയിട്ടുള്ളത്. സ്വകാര്യ ബസുകള്‍ക്കും അനുവാദം നല്‍കണം. കേരള അതിര്‍ത്തിയില്‍ താമസിക്കുന്ന മൂന്ന് കുടുംബങ്ങളോട് ഒഴിഞ്ഞുപോകാന്‍ കര്‍ണാടക ആവശ്യപ്പെട്ട കാര്യം ബിനോയ് കുര്യന്‍ ഉന്നയിച്ചു. ഇത്തരം പ്രശ്‌നങ്ങള്‍ അതിര്‍ത്തിയില്‍ താമസിക്കുന്നവരെ ഏറെ ബുദ്ധിമുട്ടിക്കുകയാണ്. അതിനാല്‍ സംയുക്ത സര്‍വേ നടത്തി പ്രശ്‌നത്തിന് ശാശ്വത പരിഹാരം ഉണ്ടാക്കാന്‍ നടപടിയെടുക്കണമെന്നും അദ്ദേഹം പറഞ്ഞു.
കോവിഡിനെ തുടര്‍ന്ന് കെഎസ്ആര്‍ടിസി മലയോര മേഖലകളിലടക്കം നിര്‍ത്തിവെച്ച സര്‍വീസുകളില്‍ പലതും പുനഃസ്ഥാപിച്ചിട്ടില്ല. കോവിഡ് നിയന്ത്രണത്തില്‍ അയവ് വന്ന് സ്‌കൂളുകള്‍ തുറന്നിട്ടും സര്വീസ് പുനഃസ്ഥാപിക്കാത്തത് യാത്രാക്ലേശം രൂക്ഷമാക്കുകയാണ്. ഒറ്റ ബസ് മാത്രമുണ്ടായിരുന്ന ചില പ്രദേശങ്ങളിലെ സര്വീസ് പോലും നിലച്ചത് പുനരാരംഭിച്ചിട്ടില്ല. ബസുകള്‍ സര്വീസ് നിര്‍ത്തിയതിനാല്‍ പട്ടികവര്‍ഗ മേഖലയിലെ വിദ്യാര്‍ഥികള്‍ക്ക് സ്‌കൂളില്‍ പോകാന്‍ കഴിയാത്ത സ്ഥിതിയാണെന്നും എംഎല്‍എമാര്‍ ചൂണ്ടിക്കാട്ടി.
പഴശി പദ്ധതി പ്രദേശങ്ങളെ കോര്‍ത്തിണക്കി ടൂറിസം സാധ്യതകള്‍ ഉപയോഗപ്പെടുത്താനുള്ള വിപുലമായ പദ്ധതി ഉണ്ടാക്കണമെന്ന് നിർദേശമുയർന്നു. വന്‍കിട റോഡ് നവീകരണ പദ്ധതികള്‍ നടപ്പാക്കുമ്പോള്‍ അതിന്‍റെ ഭാഗമായുള്ള പഴയ പാലങ്ങളും കലുങ്കുകളും വീതി കൂട്ടി പുതുക്കിപ്പണിയാന്‍ എസ്റ്റിമേറ്റ് ഉണ്ടാക്കണം. ഇങ്ങനെ ചെയ്യാത്തത് പലയിടത്തും ഗതാഗതത്തിന് ബുദ്ധിമുട്ട് സൃഷ്ടിക്കുന്നുണ്ട്. കിഫ്ബിയില്‍ ഉള്‍പ്പെടുത്തി മൂന്നു കോടി രൂപ ചെലവില്‍ നിര്‍മിക്കുന്ന സ്‌കൂളുകളുടെ പ്രവൃത്തി പൂര്‍ത്തീകരണവുമായി ബന്ധപ്പെട്ട് ഉണ്ടാകുന്ന പ്രശ്‌നങ്ങള്‍ കൃത്യമായി മനസിലാക്കി റിപ്പോര്‍ട്ട് ചെയ്യണമെന്നും യോഗം അറിയിച്ചു.
കാൾടെക്‌സ് ജംഗ്ഷന്‍ മുതല്‍ പുതിയതെരു ഭാഗം വരെയുള്ള ദേശീയ പാതയുടെ ഇരുവശത്തും വാഹനങ്ങള്‍ അനധികൃതമായി പാര്‍ക്ക് ചെയ്യുന്നത് തടയാന്‍ പരിശോധനകള്‍ നടത്തുന്നുണ്ടെന്ന് ഉദ്യോഗസ്ഥര് അറിയിച്ചു. കോവിഡ് കാരണം പിഎച്ച്‌സികളില്‍ നിര്‍ത്തിവച്ച വൈകുന്നേരങ്ങളിലെ ഒപി ചികിത്സാ സൗകര്യങ്ങള്‍ ഘട്ടംഘട്ടമായി പുനഃസ്ഥാപിക്കുന്നതിനുള്ള നടപടികള്‍ സ്വീകരിച്ചു വരുന്നുണ്ടെന്ന് ജില്ലാ മെഡിക്കല്‍ ഓഫീസര്‍ അറിയിച്ചു.
ജില്ലാ കളക്ടര്‍ എസ് ചന്ദ്രശേഖര്‍ അധ്യക്ഷത വഹിച്ചു. എംഎല്‍എമാരായ കടന്നപ്പള്ളി രാമചന്ദ്രന്‍, കെ. വി. സുമേഷ്, സജീവ് ജോസഫ്, കെ.പി. മോഹനന്‍, എം വിജിന്‍, മേയര്‍ ടി.ഒ. മോഹനന്‍, ജില്ലാ പഞ്ചായത്ത് പ്രസിഡന്‍റ പി.പി. ദിവ്യ, സബ് കളക്ടര്‍ അനുകുമാരി, ജില്ലാ പ്ലാനിംഗ് ഓഫീസര്‍ കെ.പ്രകാശന്‍, എഡിഎം കെ.കെ. ദിവാകരന്‍ തുടങ്ങിയവർ പങ്കെടുത്തു
മാക്കൂട്ടം പാതയിലെ യാത്രാ നിയന്ത്രണം ഒഴിവാക്കണം: ജില്ലാ വികസന സമിതി യോഗം
