ന്യൂഡല്‍ഹി: അടുത്തിടെയായി വേഗം കൈവന്ന കോവിഡ് രണ്ടാം വ്യാപനം ഏപ്രില്‍ രണ്ടാം വാരത്തോടെ അതിതീവ്രമാകുമെന്ന് സ്റ്റേറ്റ് ബാങ്ക് ഓഫ് ഇന്ത്യ റിപ്പോര്‍ട്ട്. ഇനിയും രണ്ടു മാസത്തിലേറെ നിലനില്‍ക്കും. 25 ലക്ഷം പേര്‍ക്കെങ്കിലും ഇത് വന്നേ രണ്ടാം തരംഗം പിന്‍വാങ്ങൂ എന്നും റിപ്പോര്‍ട്ട് പറയുന്നു. ഫെബ്രുവരി 15 മുതലാണ് രണ്ടാം തരംഗം എത്തിയതായി കണക്കാക്കുന്നത്. 100 ദിവസം നീണ്ടുനില്‍ക്കും. ഇനിയും ലോക്ഡൗണും സഞ്ചാര നിയന്ത്രണവുമായി തുടരുന്നത് ഫലം നല്‍കില്ലെന്നും പകരം വാക്സിന്‍ അതിവേഗം എല്ലാവരിലും എത്തിക്കണമെന്നും റിപ്പോര്‍ട്ട് ആവശ്യപ്പെടുന്നു.
ശരാശരി പ്രതിദിനം 34 ലക്ഷം പേരാണ് വാക്സിന്‍ സ്വീകരിക്കുന്നത്.ഇത് 40-45 ലക്ഷമായി ഉയര്‍ത്തണം. 45 വയസ്സിനു മുകളിലുള്ളവര്‍ക്ക് നാലു മാസത്തിനകം വാക്സിന്‍ നല്‍കുന്നത് പൂര്‍ത്തിയാക്കണമെന്നും റിപ്പോര്‍ട്ട് നിര്‍ദേശിക്കുന്നു.
അരലക്ഷം പിന്നിട്ട് കുതിക്കുന്ന ഇന്ത്യയില്‍ കഴിഞ്ഞ 24 മണിക്കൂറിനിടെ 53,476 പേരിലാണ് പുതുതായി രോഗ ബാധ സ്ഥിരീകരിച്ചത്. അഞ്ചു മാസത്തിനിടെ ഏറ്റവും ഉയര്‍ന്ന സംഖ്യയാണിത്. മഹാരാഷ്ട്രയില്‍ മാത്രം ഇത് 31,000 ലേറെയാണ്. 18 സംസ്ഥാനങ്ങളില്‍ വൈറസിന്‍റെ വകഭേദം കണ്ടെത്തിയതായി ആരോഗ്യ മന്ത്രാലയം വ്യക്തമാക്കിയിരുന്നു.