പൂനെ: മുന് ഇന്ത്യൻ ക്രിക്കറ്റ് താരവും സെലക്ടറും നടനുമായ സലീല് അങ്കോളയുടെ അമ്മ മാലാ അശോക് അങ്കോളയെ(77) വീട്ടില് കഴുത്തറുത്തു മരിച്ച നിലയില് കണ്ടെത്തി. പൂനെയിലെ ഡെക്കാന് ജിംഖാന പ്രദേശത്തെ പ്രഭാത് റോഡിലെ ഫ്ലാറ്റിൽ വെള്ളിയാഴ്ച വൈകിട്ടോടെയാണ് സലീല് അങ്കോളയുടെ അമ്മയെ ദുരൂഹ സാഹചര്യത്തില് മരിച്ച നിലയില് തണ്ടെത്തിയത്.
വീട്ടുജോലിക്കാരി വൈകിട്ട് വീട്ടിലെത്തി വാതിലില് മുട്ടിയപ്പോള് ആരും തുറക്കാത്തതിനെത്തുടര്ന്ന് ഇവര് ബന്ധുക്കളെ വിവരം അറിയിക്കുകയായിരുന്നു. പിന്നീട് ഇവരുടെ സാന്നിധ്യത്തില് വാതില് തുറന്നപ്പോഴാണ് കഴുത്തറുത്ത് മരിച്ച നിലയില് ചോര വാര്ന്നു കിടക്കുന്നത് കണ്ടത്. മാലാ അശോക് ജീവനൊടുക്കിയതാണെന്നാണ് പ്രാഥമിക നിഗമനമെന്നും കൂടുതല് അന്വേഷണം നടത്തുമെന്നും ഡെപ്യൂട്ടി പൊലീസ് കമ്മീഷണര് സന്ദീപ് സിംഗ് ഗില് പറഞ്ഞു.