കല്‍പ്പറ്റ: വയനാട്ടിൽ വൈത്തിരി പൊലീസ് സ്‌റ്റേഷന്‍ പരിധിയില്‍ വാഹനത്തില്‍ നിന്ന് മൊബൈല്‍ ഫോണ്‍ മോഷ്ടിച്ചു കടന്നുകളഞ്ഞ പ്രതിയെ നാല് ദിവസങ്ങള്‍ക്കുള്ളില്‍ പൊലീസ് പൊക്കി. കോഴിക്കോട് നടക്കാവ് നാലുകുടിപറമ്പ് വീട്ടില്‍ എന്‍.പി മുഹമ്മദ് സുഹൈല്‍ (23) ആണ് വൈത്തിരി പൊലീസിന്‍റെ പിടിയിലായത്. വൈത്തിരി ടൗണിലെ അജന്ത സ്റ്റുഡിയോക്ക് മുന്നില്‍ നിര്‍ത്തിയിട്ടിരുന്ന ഓട്ടോയില്‍ നിന്നാണ് ഇയാള്‍ മൊബൈൽ ഫോണ്‍ കൈക്കലാക്കിയത്.
കഴിഞ്ഞ 22ന് ആയിരുന്നു മോഷണം നടന്നത്. അന്വേഷണം തുടങ്ങിയ പൊലീസ് 26ന് പ്രതിയെ പിടികൂടി. വൈത്തിരി പൊലീസ് സബ് ഇന്‍സ്പെക്ടര്‍ പി.വി. പ്രഷോബിന്റെ നേതൃത്വത്തില്‍ ആയിരുന്നു അന്വേഷണം. സബ് ഇന്‍സ്പെക്ടര്‍മാരായ എന്‍.കെ മണി, എച്ച് അഷ്റഫ്, സീനിയര്‍ സിവില്‍ പൊലീസ് ഓഫീസര്‍ ഷാലു ഫ്രാന്‍സിസ് എന്നിവരും അന്വേഷണ സംഘത്തിലുണ്ടായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍റ് ചെയ്തു.