ഉടുമ്പൻചോല: ഇടുക്കിയിൽ അനധികൃത മദ്യ വില്പനയ്ക്ക് സൂക്ഷിച്ചിരുന്ന 40 ലിറ്റർ ഇന്ത്യൻ നിർമിത വിദേശ മദ്യം എക്സൈസ് പിടികൂടി. ഉടുമ്പൻചോല കൽകൂന്തൽ സ്വദേശി ബിബിൻ എന്നയാളിൽ നിന്നുമാണ് എക്സൈസ് മദ്യം പിടിച്ചെടുത്തത്. ഇയാളിൽ നിന്നും 1200 രൂപ തൊണ്ടി മണിയായി കണ്ടെടുത്തു. ചില്ലറ വിൽപ്പനയ്ക്കായി ബിവറേജിൽ നിന്ന് വാങ്ങി സൂക്ഷിച്ച മദ്യമാണ് പിടിച്ചെടുത്തതെന്ന് എക്സൈസ് ഉദ്യോഗസ്ഥർ വ്യക്തമാക്കി.
എക്സൈസ് സ്‌പെഷ്യൽ സ്‌ക്വാഡ് അസിസ്റ്റൻറ് എക്സൈസ് ഇൻസ്‌പെക്ടർ നെബു എ.സിയുടെ സംഘമാണ് ബിബിനെ അറസ്റ്റ് ചെയ്തത്. പാർട്ടിയിൽ പ്രിവന്റീവ് ഓഫീസർ ഗ്രേഡ് ഷിജു പി കെ, സിവിൽ എക്സൈസ് ഓഫീസർ ആൽബിൻ ജോസ്, അശ്വതി വി, ഡ്രൈവർ ശശി പി കെ എന്നിവർ പങ്കെടുത്തു.