മട്ടന്നൂർ: ചാരായ നിർമാണത്തിനായി വാഷ് സൂക്ഷിച്ചതിന് ചാവശ്ശേരിപ്പറമ്പ് സ്വദേശി കെ.പി. കൃഷ്ണണൻ (53) എന്നയാളെ എക്സൈസ് അറസ്റ്റ് ചെയ്തു. ചാരായ നിർമാണത്തിനായി സൂക്ഷിച്ച 15 ലിറ്റർ വാഷ് കണ്ടെടുത്തു.
മട്ടന്നൂർ എക്സൈസ് റേഞ്ച് അസിസ്റ്റന്റ് എക്സൈസ് ഇൻസ്പെക്ടർ സി.ജയചന്ദ്രന്റെ നേതൃത്വത്തിൽ ചാവശ്ശേരി പറമ്പിലെ മൺപാത്ര നിർമാണ കോളനിയിൽ നടത്തിയ പരിശോധനയിലാണ് ഇയാൾ അറസ്റ്റിലായത്. പാർട്ടിയിൽ അസി. എക്സൈസ് ഇൻസ്പെക്ടർ (ഗ്രേഡ്) കെ. ഉത്തമൻ, ഗ്രേഡ് പ്രിവന്റീവ് ഓഫീസർമാരായ പി.കെ. സജേഷ്, വി.എൻ. സതീഷ്, മഞ്ജു വർഗീസ്, കെ.ടി. ജോർജ് എന്നിവർ പങ്കെടുത്തു. മട്ടന്നൂർ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.