ചരിത്രത്തിൽ ഇടം പിടിച്ച വനിത. കേരളത്തിന്റെ ആദ്യ വാർത്താ അവതാരക. പ്രിയപ്പെട്ട ഹേമചേച്ചി നീണ്ട 39 വർഷത്തെ മാധ്യമ പ്രവർത്തനത്തിന് ഇന്ന് സൈൻ ഓഫ്‌ നൽകുകയാണ്. മാധ്യമ പ്രവർത്തന രംഗത്ത് ഇന്ത്യയിൽ തന്നെ ഇത്രയേറെ പ്രവർത്തന പരിചയ സമ്പത്തുള്ള മറ്റൊരാൾ ഉണ്ടോ എന്നറിയില്ല.
ദൂരദർശൻ പ്രേക്ഷകർക്ക് സുപരിചിതയായ മികച്ച ന്യൂസ് റീഡർ ഡി. ഹേമലത 39 വർഷം പൂർത്തീകരിച്ച് ദൂരദര്‍ശന്‍റെ പടിയിറങ്ങി. ഇന്നലെ വൈകുന്നേരം ഏഴ് മണിക്കുള്ള അവസാന ബുള്ളറ്റിന്‍ വായിച്ചായിരുന്നു മടക്കം. അസി. ന്യൂസ് എഡിറ്റര്‍ പാനലിലാണ് ഹേമലത ഒടുവിൽ പ്രവർത്തിച്ചിരുന്നത്. വാർത്താ വായനയിലൂടെ ദൂരദർശൻ ജീവിതം ആരംഭിച്ചതിനാലാണ് പ്രിയ പ്രേക്ഷകരോട് യാത്ര പറയാൻ അവസാന പ്രവൃത്തിദിനത്തിൽ ന്യൂസ് റീഡറായി എത്തിയത്.