മന്ത്രിമന്ദിരങ്ങളുടെ അറ്റകുറ്റപ്പണിക്ക് 6 മാസത്തിനിടെ യു ഡി എഫ് സർക്കാർ അനുവദിച്ചത് 5.63 കോടി; വിവരാവകാശ രേഖ

തിരുവനന്തപുരം: യുഡിഎഫ് സര്ക്കാര് അധികാരത്തില് വന്ന് ആറ് മാസത്തിനിടയില് മന്ത്രി മന്ദിരങ്ങളുടെ അറ്റകുറ്റപ്പണികള്ക്കും മോടിപിടിപ്പിക്കലിനുമായി 5.63 കോടി രൂപ അനുവദിച്ചതായി പൊതുമരാമത്ത് വകുപ്പിന്റെ വിവരാവകാശ രേഖ. പൊതുപ്രവര്ത്തകന് പി കെ രാജ് നല്കിയ വിവരാവകാശ അപേക്ഷയിലാണ് പൊതുമരാമത്ത് വകുപ്പ് ഈ മറുപടി നല്കിയിരിക്കുന്നത്.
മന്ത്രി അനൂപ് ജേക്കബ് താമസിക്കുന്ന മന്മോഹന് ബംഗ്ലാവിനാണ് അറ്റകുറ്റപ്പണികള്ക്കായി ഏറ്റവും കൂടുതല് തുക അനുവദിച്ചിരിക്കുന്നത്. 81.06 ലക്ഷം രൂപയാണ് സര്ക്കാര് അനുവദിച്ചത്. എക്സൈസ് മന്ത്രി എം ലിജു താമസിക്കുന്ന അജന്ത ബംഗ്ലാവിനായി 58.47 ലക്ഷം രൂപയും വിദ്യാഭ്യാസ മന്ത്രി എന്. ഷംസുദ്ദീന്റെ നെസ്റ്റ് ബംഗ്ലാവിനായി 40.66 ലക്ഷം രൂപയും തദ്ദേശസ്വയംഭരണ വകുപ്പ് കൈകാര്യം ചെയ്യുന്ന കെ എം ഷാജിയുടെ പൗര്ണമി ബംഗ്ലാവിനായി 40.81 ലക്ഷം രൂപയും അനുവദിച്ചിട്ടുണ്ട്.
പൊതുമരാമത്ത് വകുപ്പ് മന്ത്രി പി കെ ബഷീര് താമസിക്കുന്ന ഉഷസ് ബംഗ്ലാവിനായി 40 ലക്ഷവും രമേശ് ചെന്നിത്തലയുടെ പമ്പ ബംഗ്ലാവിനായി 30 ലക്ഷത്തിലധികം രൂപയും അനുവദിച്ചിട്ടുണ്ട്. ഇതില് ശീതീകരണത്തിനും വൈദ്യുതീകരണത്തിനുമായി മാത്രം 10 ലക്ഷത്തിലധികം രൂപ ചെലവഴിച്ചു എന്നാണ് റിപ്പോര്ട്ട്. അതേസമയം, മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിന്റെ അറ്റകുറ്റപ്പണികള്ക്കായി ഘട്ടംഘട്ടമായി ചെലവായ മുഴുവന് തുകയുടെ വിവരങ്ങളും നല്കാന് വിവരാവകാശ രേഖയില് പൊതുമരാമത്ത് വകുപ്പ് തയ്യാറായിട്ടില്ല.
ക്ലിഫ് ഹൗസില് എയര് കണ്ടീഷണര് സ്ഥാപിക്കുന്നതിന് നാല് ലക്ഷം രൂപയും വൈദ്യുതീകരണത്തിനായി മൂന്ന് ലക്ഷം രൂപയും ഉള്പ്പെടെ ഏഴ് ലക്ഷത്തിലധികം രൂപ ചെലവഴിച്ചു എന്ന കണക്ക് മാത്രമാണ് നിലവില് ലഭ്യമായിട്ടുള്ളത്. പൂര്ണമായും ചെലവഴിച്ച തുക വന്നതിനുശേഷം മാത്രമേ ഇതില് വ്യക്തത വരുത്താന് സാധിക്കൂ എന്നാണ് പൊതുമരാമത്ത് വകുപ്പിന്റെ മറുപടി. നേരത്തെ കന്റോണ്മെന്റ് ഹൗസില് നിന്നും ക്ലിഫ് ഹൗസിലേക്ക് മാറും മുന്പ് തന്നെ അറ്റകുറ്റപ്പണികള് പൂര്ത്തിയാക്കിയിരുന്നു.
പൊതുമരാമത്ത് വകുപ്പ് നല്കിയിരിക്കുന്നത് കെട്ടിട അറ്റകുറ്റപ്പണികളുടെ കണക്കുകള് മാത്രമാണ്. ഫര്ണിച്ചറുകള് വാങ്ങിയതിന്റെ പൂര്ണ വിവരങ്ങള് ഇതില് വ്യക്തമല്ല. കഴിഞ്ഞ ദിവസങ്ങളില് മന്ത്രിമാര്ക്കായി കാര് വാങ്ങുന്നതിന് ഒരു കോടിയിലധികം രൂപ ചെലവഴിച്ചതില് പ്രതിപക്ഷ വിമര്ശനങ്ങള് ശക്തമാകുന്നതിനിടയിലാണ് മന്ദിരങ്ങളുടെ അറ്റകുറ്റപ്പണികളുടെ ചെലവുകളുടെ വിശദാംശങ്ങളും പുറത്തുവരുന്നത്.




