‘സരൾ നിയമം സരളമല്ല, അബ്കാരി നയം എന്താണ്? അങ്ങാടി കച്ചവടമാണോ വൈദ്യുതി? അഴിമതിയുടെ രാജാക്കന്മാരായി മാറാൻ സർക്കാർ തിടുക്കം കാണിക്കുന്നു’: ബിനോയ് വിശ്വം

യുഡിഎഫ് സർക്കാരിനെതിരെ രൂക്ഷ വിമർശനവുമായി സിപിഐ സംസ്ഥാന സെക്രട്ടറി ബിനോയ് വിശ്വം. വി ഡി സതീശൻ സർക്കാരിന്റെ ഹണിമൂൺ പീരിയഡ് കഴിഞ്ഞുവെന്നും പറഞ്ഞ കാര്യങ്ങൾക്കെല്ലാം വിപരീതമായ ദിശയിലാണ് സർക്കാർ പോകുന്നതെന്നും അദ്ദേഹം പറഞ്ഞു. സർക്കാരിന്റെ നയങ്ങളെയും ബിനോയ് വിശ്വം നിശിതമായി വിമർശിച്ചുസരൾ നിയമത്തിൽ സരളമായത് ഒന്നുമില്ല. പാറ പൊട്ടിക്കാൻ ഒരു നിയന്ത്രണവും ഇനി ഇല്ല. ആ തീരുമാനത്തിലേക്ക് സർക്കാർ എത്തിക്കഴിഞ്ഞു. എല്ലാം മാന്തിയെടുക്കാം, എല്ലാം കുഴിച്ചെടുക്കാം എന്നതാണ് ഈ സർക്കാർ നയം. ഭൂപരിഷ്കരണത്തെയും സർക്കാർ അട്ടിമറിക്കുന്നതായി ചൂണ്ടിക്കാട്ടിയ അദ്ദേഹം തിരിച്ചുപോക്കിനു വേണ്ടിയാണ് സതീശൻ സർക്കാർ ശ്രമിക്കുന്നതെന്നും പറഞ്ഞു. അഴിമതിയുടെ രാജാക്കന്മാരായി മാറാൻ ഈ സർക്കാർ തിടുക്കം കാണിക്കുകയാണെന്നും അദ്ദേഹം ചൂണ്ടിക്കാട്ടി.എല്ലാം എല്ലാ മന്ത്രിമാർക്കും അറിയണമെന്നില്ല. പക്ഷേ മുഖ്യമന്ത്രിക്ക് അറിയാം. എവിടെയാണ് കൂട്ടുത്തരവാദിത്വം? സ്വന്തം വകുപ്പിലെ കാര്യങ്ങൾ മന്ത്രിമാർ അറിയുന്നില്ല. എല്ലാം മുഖ്യമന്ത്രി പറയും എന്നാണ് വൈദ്യുതി വകുപ്പ് മന്ത്രി പറയുന്നത്. അങ്ങാടി കച്ചവടമാണോ വൈദ്യുതിയെന്നും ജിഎൻഎ കരാറിന്റെ പശ്ചാത്തലത്തിൽ ബിനോയ് വിശ്വം ചോദിച്ചു.

ജിഎൻഎ വൈദ്യുതി മാത്രമേ വാങ്ങാവൂ എന്ന വാശി എന്തിനാണ് മുഖ്യമന്ത്രിക്ക്? സർക്കാരിൻറെ അബ്കാരി നയം എന്താണ്? ആരാണ് അത് തീരുമാനിക്കുന്നത്? ഇതിനൊക്കെ ഉത്തരം കിട്ടണം. എക്സൈസ് കമ്മീഷണർ ആയിരുന്ന ഉദ്യോഗസ്ഥൻ പറയുന്നത് സർക്കാരിന് അക്കാരി നയം എന്ന് ഒന്ന് ഇല്ല എന്നാണ്. ബാറുകൾക്ക് ലൈസൻസുകൾ തോന്നുംപോലെ കൊടുക്കുകയാണ്. ഏതു മദ്യവും എവിടെയും വിൽക്കാൻ തിടുക്കം സർക്കാർ കാണിക്കുന്നു. ഇതിനൊക്കെ പുറകിലുള്ള ലജ്ജാകരമായ കൊടുക്കൽ വാങ്ങൽ എന്താണ്? സർക്കാരിന്റെ ഈ പോക്ക് ഒട്ടും സ്വകാര്യമല്ലസ്വാശ്രയ സ്വയംഭരണ സ്ഥാപനങ്ങൾക്ക് സർവ്വാധികാരം വരികയാണ്. എന്തായിരിക്കും വിദ്യാഭ്യാസ രംഗത്തിന്റെ സ്ഥിതി? വിദ്യാഭ്യാസരംഗത്ത് കേരളം നേടിയ എല്ലാ നേട്ടങ്ങളും ഇനിയെന്താകും? വിദ്യാഭ്യാസരംഗത്ത് സർക്കാരിന് നയം ഉണ്ടെങ്കിൽ അത് വ്യക്തമാക്കണമെന്നും അദ്ദേഹം ആവശ്യപ്പെട്ടു.

അതേസമയം മാരിടൈം ബിൽ കേരളത്തിന്റെ തീര മേഖലയിലെ വിഭവങ്ങൾ തോന്നുംപോലെ കൊള്ളയടിക്കാൻ സ്വകാര്യ കുത്തുകൾക്ക് അനുമതി കൊടുക്കുന്ന നയമാണെന്നും ബിനോയ് വിശ്വം വ്യക്തമാക്കി. സ്വകാര്യ മേഖലയ്ക്ക് നാടിനെ കൊള്ളയടിക്കാൻ ചുവന്ന പരവതാനി വിരിച്ചു കൊടുക്കുകയാണ് സർക്കാർ. യുഡിഎഫ് സർക്കാർ സ്വകാര്യ മേഖലയുടെ വിശ്വസ്തനായ കാര്യസ്ഥൻമാരായി മാറുന്നു. യുഡിഎഫ് സർക്കാരിന്റെ തെറ്റായ നയങ്ങൾക്കെതിരെ എൽഡിഎഫ് പ്രക്ഷോഭം തീരുമാനിച്ചിട്ടുണ്ടെന്നും അദ്ദേഹം അറിയിച്ചു.