സംസ്ഥാനത്ത് ആശങ്കയായി ഡെങ്കിപ്പനി വ്യാപനം; കഴിഞ്ഞ മാസം മാത്രം രോ​ഗം സ്ഥിരീകരിച്ചത് 1622 പേർക്ക്

സംസ്ഥാനത്ത് ആശങ്കയായി ഡെങ്കിപ്പനി വ്യാപനം വർദ്ധിക്കുന്നു. ദിവസവും നിരവധി പേർക്കാണ് ഡെങ്കിപ്പനി സ്ഥിരീകരിക്കുന്നത്. കഴിഞ്ഞ മാസം മാത്രം 1622 പേർക്കാണ് ഡെങ്കിപ്പനി സ്ഥിരീകരിച്ചത്. രോഗവ്യാപനത്തിന് പുറമേ ആശുപത്രികളിൽ മരുന്നില്ലാത്തതും മതിയായ ഡോക്ടർമാർ ഇല്ലാത്തതും പ്രതിസന്ധി രൂക്ഷമാക്കുന്നുണ്ട്.

പനി, ഇൻഫ്ലുവൻസ, ചിക്കൻപോക്സ്, ഷി​ഗല്ല, പകർച്ചവ്യാധി വ്യാപനം തുടങ്ങിയ കഴിഞ്ഞ മൂന്നുമാസമായി സംസ്ഥാനത്ത് റിപ്പോർട്ട് ചെയ്തത് നിരവധി രോഗങ്ങളാണ്. ഇതിനു പിന്നാലെ സംസ്ഥാനത്ത് ഡെങ്കിപ്പനി വ്യാപനം ആണ് ഇപ്പോൾ ആശങ്ക പടർത്തുന്നത്. കൂടാതെ നൂറിലധികം ആളുകളാണ് ഡെങ്കിപ്പനി ലക്ഷണങ്ങളോടെ വിവിധ ആശുപത്രികളിൽ ചികിത്സ തേടുന്നത്അതേസമയം കഴിഞ്ഞവർഷത്തേക്കാൾ കൂടുതലാണ് ഡെങ്കിപ്പനി വ്യാപനമെന്ന് കണക്കുകളിൽ നിന്ന് വ്യക്തമായിട്ടും രോഗവ്യാപനം ഇല്ലെന്നാണ് വകുപ്പ് മന്ത്രി കെ മുരളീധരൻ വാദിക്കുന്നത്. അഞ്ചാംപനി വ്യാപനത്തിലും ഇതേ വർദ്ധനവ് തന്നെയാണ് ഇത്തവണ ഉണ്ടായിട്ടുള്ളത്.

രോഗവ്യാപനം മുൻനിർത്തി കൃത്യമായ ബോധവൽക്കരണ നടപടികൾ നടത്താത്തതും ഡ്രൈ ഡേ അടക്കമുള്ള പ്രതിരോധമാർഗങ്ങൾ ശക്തിപ്പെടുത്താത്തതുമാണ് പ്രതിസന്ധി രൂക്ഷമാക്കിയത്. നേരത്തെ മഴക്കാലപൂർവ്വ ശുചീകരണം കൃത്യമായി നടത്താത്തത് മൂലം സംസ്ഥാനത്ത് പകർച്ചവ്യാധി വ്യാപനം രൂക്ഷമായിരുന്നു. അതിനു പിന്നാലെയാണ് വീണ്ടും ആരോഗ്യവകുപ്പ് ഒരു പ്രതിസന്ധി കാലത്തേക്ക് സംസ്ഥാനത്തെ തള്ളിവിടുന്നത് എന്ന വിമർശനവുമുണ്ട്. ഇതിനുപുറമേ ആശുപത്രികളിൽ മതിയായ ഡോക്ടർമാരുടെ സേവനം ഇല്ലാത്തതും മരുന്ന് ക്ഷാമവും ജനങ്ങളെ വലയ്ക്കുന്നുണ്ട്.