ബംഗളൂരു: കർണാടക തെരഞ്ഞെടുപ്പ് ഫലം പുരോഗമിക്കുമ്പോൾ കോൺഗ്രസ് മുന്നേറ്റമാണ് വ്യക്തമാകുന്നത്. ഒടുവിലത്തെ ലീഡ് നിലയനുസരിച്ച് കോൺഗ്രസ് കേവലഭൂരിപക്ഷം പിന്നിട്ടുകഴിഞ്ഞു. 117 സീറ്റുകളിലാണ് കോൺഗ്രസ് മുന്നിട്ട്‌നിൽക്കുന്നത്. 224 അംഗ നിയമസഭയിൽ 113 അംഗളാണ് ഭൂരിപക്ഷത്തിന് വേണ്ടത്. അതേസമയം രാഷ്ട്രീയകുതിരക്കച്ചവടം തടയാനുള്ള ശ്രമങ്ങൾ കോൺഗ്രസ് നേതൃത്വം നേരത്തെ ആരംഭിച്ചുകഴിഞ്ഞു.
ബംഗളൂരുവിലേക്ക് എത്താൻ കോൺഗ്രസ് എം.എൽ.എമാർക്ക് പാര്‍ട്ടി നിർദേശം നൽകിക്കഴിഞ്ഞു. ഇതിനായി വിമാനമുൾപ്പെടെയുള്ള തയ്യാറെടുപ്പുകൾ കോൺഗ്രസ് തയ്യാറാക്കിക്കഴിഞ്ഞുവെന്നാണ് റിപ്പോർട്ടുകൾ. കോൺഗ്രസ് അദ്ധ്യക്ഷൻ ഡി.കെ ശിവകുമാറാണ് ഇതിന് നേതൃത്വം കൊടുക്കുന്നത്. എം.എല്‍.എമാരെ സമീപിക്കാനുള്ള ബി.ജെ.പിയുടെ ശ്രമം തുടക്കത്തിലെ തടയുകയാണ് കോണ്‍ഗ്രസ്.