ക്വാറിയിലുണ്ടായിരുന്നു എന്നതുകൊണ്ടുമാത്രം അനധികൃത ഖനനമാരോപിച്ച് വാഹനങ്ങള് പിടിച്ചെടുക്കാനാവില്ലെന്നും പാസില്ലാതെ ഖനനവസ്തു കടത്തിയാലേ വാഹനങ്ങള് പിടിച്ചെടുക്കാനാവൂ എന്നും ഹൈക്കോടതി .
അനധികൃത ഖനനം ആരോപിച്ച് മലപ്പുറം വളാഞ്ചേരി പോലീസ് പിടികൂടിയ രണ്ടു ടിപ്പര് ലോറികള് വിട്ടുകൊടുക്കാനുള്ള ഉത്തരവിലാണ് ജസ്റ്റീസ് എന്. നഗരേഷ് ഇക്കാര്യം വ്യക്തമാക്കിയത്. ലോറികള് വിട്ടുകിട്ടാന് മലപ്പുറം സ്വദേശികളായ വി.പി. രഘുനാഥന്, ഗണേഷ് എന്നിവര് നല്കിയ ഹര്ജിയാണ് കോടതി പരിഗണിച്ചത്.
അനധികൃതമായി വെട്ടുകല്ല് ഖനനം ചെയ്യുന്നിടത്തു നിന്നാണ് ലോറികള് പിടികൂടിയതെന്നും ഇവ വെട്ടുകല്ലു കടത്താന് ഉപയോഗിച്ചെന്നുമാണ് കേസ്. എന്നാല് പോലീസ് പിടികൂടുമ്പോള് ലോറികളില് വെട്ടുകല്ല് ഉണ്ടായിരുന്നില്ല. ഇക്കാര്യം മഹസറിലും രേഖപ്പെടുത്തിയിട്ടുണ്ട്.
തങ്ങളുടെ ലോറികള് വെട്ടുകല്ല് കടത്താന് ഉപയോഗിച്ചിട്ടില്ലെന്നും നിയമവിരുദ്ധമായാണ് ലോറികള് പിടിച്ചെടുത്തതെന്നുമായിരുന്നു ഹര്ജിക്കാരുടെ വാദം. ഈ വാദം അംഗീകരിച്ചാണ് ലോറികള് വിട്ടു കൊടുക്കാന് കോടതി ഉത്തരവിട്ടത്.