തിരുവനന്തപുരം: സംസ്ഥാന പാതയില്‍ പാലോട് സാമി മുക്കില്‍ സ്വകാര്യ ബസ്സും ബൈക്കും കൂട്ടിയിടിച്ചുണ്ടായ അപകടത്തില്‍ രണ്ട് യുവാക്കള്‍ മരിച്ചു. പാലോട് ചല്ലിമുക്ക് സ്വദേശികളായ ഉണ്ണി, നവാസ് എന്നിവരാണ് മരിച്ചത്. രാവിലെ ഏഴരയോടെയായിരുന്നു അപകടമുണ്ടായത്.
എതിര്‍ ദിശകളില്‍ നിന്നെത്തിയ വാഹനങ്ങള്‍ കൂട്ടിയിടിക്കുകയായിരുന്നു. ഇടിയുടെ ആഘാതത്തില്‍ ബൈക്ക് പൂര്‍ണമായും തകര്‍ന്നു. ബൈക്ക് അമിത വേഗതയിലായിരുന്നുവെന്ന് ദൃക്‌സാക്ഷികള്‍ പറഞ്ഞു. പാലോട് നിന്നും മടത്തറിലേക്ക് വരികയായിരുന്നു ബസ്.
എതിര്‍ ദിശയില്‍ അമിത വേഗതയില്‍ വന്ന ബൈക്ക് വളവില്‍ നിയന്ത്രണം വിട്ട് ബസ്സിലേക്ക് ഇടിച്ചുകയറി. ബസിനടയിലേക്ക് വീണ ഇരുവരുടെയും ശരീരത്തിലൂടെ ബസ് കയറിയിറങ്ങി. രണ്ടുപേരും അപകടസ്ഥലത്ത് വെച്ചു തന്നെ മരിച്ചു. പോലീസ് സംഭവ സ്ഥലത്തെത്തി തുടര്‍ നടപടികള്‍ സ്വീകരിച്ചു.