നഗരസഭയിലെ കത്ത് വിവാദത്തില് മേയര് ആര്യാ രാജേന്ദ്രന്റെ മൊഴി ക്രൈംബ്രാഞ്ച് ഇന്ന് രേഖപ്പെടുത്തും. മേയര് മുഖ്യമന്ത്രിക്ക് നല്കിയ പരാതിയുടെ അടിസ്ഥാനത്തിലാണ് അന്വേഷണം നടക്കുന്നത്.
സംഭവത്തില് സിപിഎം ജില്ലാ സെക്രട്ടറി ആനാവൂര് നാഗപ്പന്, ഡി.ആര്.അനില്, മേയറുടെ ഓഫീസിലെ സ്റ്റാഫ് തുടങ്ങിയവരുടെയും മൊഴി എടുക്കും.കേസ് രജിസ്റ്റര് ചെയ്യാതെയുള്ള പ്രാഥമിക അന്വേഷണമാണ് നിലവില് നടക്കുന്നത്. മൊഴി രേഖപ്പെടുത്തിയശേഷം കേസെടുത്ത് അന്വേഷണം നടത്താന് ശിപാര്ശ ചെയ്തേക്കും.
തിരുവനന്തപുരം കോര്പ്പറേഷനു കീഴിലുള്ള അര്ബന് പ്രൈമറി ഹെല്ത്ത് സെന്ററുകളിലേക്ക് 295 ഒഴിവുണ്ടെന്നും ഉദ്യോഗാര്ഥികളുടെ മുന്ഗണനാപട്ടിക നല്കണമെന്നും ആവശ്യപ്പെട്ട് മേയര് സിപിഎം ജില്ലാ സെക്രട്ടറിക്ക് നല്കിയ കത്താണ് പുറത്തുവന്നത്.
‘സഖാവെ’ എന്ന് അഭിസംബോധന ചെയ്തുകൊണ്ട് മേയറുടെ ഔദ്യോഗിക ലെറ്റര് പാഡിലെഴുതിയ കത്ത് വലിയ വിവാദത്തിന് തിരി കൊളുത്തിയിരുന്നു.
കത്ത് താന് എഴുതിയതല്ലെന്നായിരുന്നു മേയറുടെ വിശദീകരണം.