പെരിയയില് ദേശീയപാതയുടെ ഭാഗമായി നിര്മിക്കുന്ന അടിപ്പാത തകര്ന്നു വീണ സംഭവത്തില് ബേക്കല് പോലീസ് കേസെടുത്തു. മനുഷ്യജീവന് അപകടമുണ്ടാക്കുന്ന തരത്തില് നിര്മാണം നടത്തിയതിനാണ് കേസെടുത്തത്.
ഐപിസി 336, 338, കെപി 118 വകുപ്പുകള് പ്രകാരമാണ് കേസ്. അടിപ്പാതയുടെ നിര്മാണം പുരോഗമിക്കുന്നതിനിടെ ഇന്നു പുലര്ച്ചെ മൂന്നിനാണ് അപകടമുണ്ടായത്.
പാലത്തിന്റെ നടുഭാഗമാണ് ആദ്യം തകര്ന്നുവീണത്. പിന്നീട് പത്ത് സെക്കന്റിനുള്ളില് അടിപാത പൂര്ണമായും തകര്ന്നുവീണു.
അപകടത്തില് അതിഥി തൊഴിലാളിയായ സോനുവിന് മാത്രമാണ് പരിക്കേറ്റത്. ഇയാളുടെ പരിക്ക് ഗുരുതരമല്ലെന്നാണ് വിവരം.