കണ്ണൂർ: പിണറായിൽ ആർ.എസ്.എസ്. പഥസഞ്ചലനം സംഘടിപ്പിച്ചതിനെതിരെ പിണറായി പോലീസ് 110 പേർക്കെതിരേ കേസെടുത്തു. കണ്ണൂർ ജില്ലയിലെ പിണറായി പോലീസ് സ്റ്റേഷൻ പരിധിയിൽ അനുമതിയില്ലാതെ പഥസഞ്ചലനം സംഘടിപ്പിച്ചതിന് ആർ.എസ്.എസ്. നേതാക്കൾ ഉൾപ്പെടെ 110-ഓളം പ്രവർത്തകർക്കെതിരേ കേസ്. പിണറായി പോലീസ് സ്റ്റേഷൻ പരിധിയിൽ ഒക്ടോബർ 5 വിജയദശമിദിനത്തിൽ നടത്തിയ പഥസഞ്ചലനത്തിൽ പങ്കെടുത്തവർക്കെതിരേയാണ് കേസെടുത്തത്.
മുഖ്യമന്ത്രി പിണറായി വിജയന്റെ മണ്ഡലമായ ധർമടം നിയോജക മണ്ഡലത്തിലാണ് സംഭവം നടന്നത്. അനുമതിയില്ലാതെ ഉച്ചഭാഷിണി ഉപയോഗിച്ചതിനും കേസെടുത്തിട്ടുണ്ട്. ഒക്ടോബർ 5 ന് വൈകീട്ട് കണ്ണൂർ ജില്ലയിലെ പിണറായിയിൽനിന്ന് കണ്ണൂർ മമ്പറത്തേക്കായിരുന്നു പദസഞ്ചലനം സംഘടിപ്പിച്ചത്. കേസെടുത്തതായി പിണറായി സബ് ഇൻസ്പെക്ടർ വി എസ് ബാവിഷ് അറിയിച്ചു.