*കേളകം:* പാലുകാച്ചിമലയിൽ നാളെ മുതൽ സഞ്ചാരികൾക്ക് പ്രവേശനം. രാവിലെ 10.30ന് കണ്ണൂര് ഡിഎഫ്ഒ പി. കാര്ത്തിക് ആദ്യ ട്രക്കിംഗ് സംഘത്തിനുള്ള ഫ്ലാഗ് ഓഫ് കര്മം നിര്വഹിക്കും.
പ്രവേശന ഫീസ് ഈടാക്കിയാണ് സഞ്ചാരികളെ മലയിലേക്ക് കടത്തിവിടുക. ജൂണ് മൂന്നിന് ഇവിടെ ട്രക്കിംഗ് ഉദ്ഘാടനം ചെയ്തിരുന്നെങ്കിലും ഇന്ഷുറന്സ് പരിരക്ഷ ഏർപ്പെടുത്താതിരുന്നതിനാൽ സഞ്ചാരികൾക്ക് പ്രവേശനമുണ്ടായിരുന്നില്ല.
പാലുകാച്ചി വനസംരക്ഷണ സമിതിക്കാണ് നടത്തിപ്പ് ചുമതല. ടിക്കറ്റ് കൗണ്ടര്, ക്ലോക്ക് റൂം, ടോയ്ലറ്റ് സൗകര്യം എന്നിവ ഒരുക്കിയിട്ടുണ്ട്.
കേളകം ഗ്രാമപഞ്ചായത്ത് പ്രസിഡന്റ് സി.ടി. അനീഷ്, കൊട്ടിയൂർ ഗ്രാമപഞ്ചായത്ത് വൈസ് പ്രസിഡന്റ് ഫിലോമിന തുമ്പൻതുരുത്തിയിൽ, കൊട്ടിയൂർ റേഞ്ച് ഫോറസ്റ്റ് ഓഫീസർ സുധീർ നാരോത്ത്, മണത്തണ സെക്ഷൻ ഫോറസ്റ്റ് ഓഫീസർ സി.കെ. മഹേഷ്, വനസംരക്ഷണ സമിതി പ്രസിഡന്റ് ജോർജ്കുട്ടി കുപ്പക്കാട്ട് എന്നിവർ അറിയിച്ചു.