ന്യൂഡൽഹി: പശ്ചിമേഷ്യയിലെ സംഘർഷാവസ്ഥയെ തുടർന്ന് സൗദി അറേബ്യയിൽ കുടുങ്ങിക്കിടന്ന ഏകദേശം 3,000 ഇന്ത്യൻ ഉംറ തീർത്ഥാടകർ കഴിഞ്ഞ ഒരു ആഴ്ചയ്ക്കുള്ളിൽ സുരക്ഷിതമായി നാട്ടിലെത്തിയതായി കേന്ദ്ര വിദേശകാര്യ മന്ത്രാലയം അറിയിച്ചു. ഇതിനുപുറമേ, ലഭ്യമായ വിമാന മാർഗ്ഗങ്ങളിലൂടെ പതിനായിരത്തിലധികം തീർത്ഥാടകരും ഇതിനകം നാട്ടിലേക്ക് മടങ്ങിയിട്ടുണ്ടെന്ന് മന്ത്രാലയം വ്യക്തമാക്കി.
സൗദിയിൽ ശേഷിക്കുന്ന ഇന്ത്യൻ തീർത്ഥാടകരെ കൂടി എത്രയും വേഗം നാട്ടിലെത്തിക്കാൻ സൗദി അറേബ്യയിലെ ഇന്ത്യൻ എംബസിയും കോൺസുലേറ്റും വിവിധ വിമാനക്കമ്പനികളുമായും ടൂർ ഓപ്പറേറ്റർമാരുമായും ചേർന്ന് ഊർജ്ജിത ശ്രമങ്ങൾ നടത്തുന്നുണ്ട്.
തീർത്ഥാടകർക്ക് ആവശ്യമായ സഹായങ്ങൾ ഉറപ്പാക്കാൻ റിയാദിലും ജിദ്ദയിലും 24 മണിക്കൂറും പ്രവർത്തിക്കുന്ന കൺട്രോൾ റൂമുകൾ തുറന്നിട്ടുണ്ട്. ഇന്ത്യൻ ഉദ്യോഗസ്ഥരും സന്നദ്ധപ്രവർത്തകരും ചേർന്നാണ് ഇവിടങ്ങളിൽ സേവനം നൽകുന്നത്. മേഖലയിലെ സാഹചര്യങ്ങൾ അപ്പപ്പോൾ വിലയിരുത്തുന്നുണ്ടെന്നും ആവശ്യമായ നിർദ്ദേശങ്ങൾ ഇന്ത്യൻ പൗരന്മാർക്ക് നൽകിവരുന്നുണ്ടെന്നും മന്ത്രാലയം അറിയിച്ചു.
