Uncategorized

അന്യസംസ്ഥാന തൊഴിലാളിയുടെ മരണം: പ്രതിയെ പശ്ചിമബംഗാളില്‍ നിന്നു പിടികൂടി പൊലിസ്

വൈപ്പിന്‍: അന്യസംസ്ഥാന മത്സ്യത്തൊഴിലാളി മത്സ്യബന്ധന ബോട്ടില്‍ നിന്നും കായലില്‍ വീണുമരിച്ച സംഭവത്തില്‍ മറ്റൊരു അന്യസംസ്ഥാന തൊഴിലാളി അറസ്റ്റില്‍. പശ്ചിമബംഗാള്‍ സ്വദേശി ലിന്‍റന്‍ ദാസ് ആണ് അറസ്റ്റിലായത്. പശ്ചിമ ബംഗാള്‍ സ്വദേശിയായ കമാല്‍ മാലോ (30) ആണ് മരിച്ചത്. ഇരുവരും മുനമ്പം കേന്ദ്രീകരിച്ച് മത്സ്യബന്ധനം നടത്തുന്ന ഗോഡ്‌സ്‌വേ എന്ന ബോട്ടിലെ മത്സ്യത്തൊഴിലാളികളാണ്.

റൂറല്‍ പൊലിസ് മേധാവി സുദര്‍ശന്‍റെ നിര്‍ദേശ പ്രകാരം മുനമ്പം ഡിവൈഎസ്പിയുടെ നേതൃത്വത്തില്‍ രൂപീകരിച്ച അന്വേഷണസംഘം പശ്ചിമ ബംഗാളില്‍ നിന്നാണ് പ്രതിയെ അറസ്റ്റ് ചെയ്തത്. ഈ മാസം ആറിന് പള്ളിപ്പുറം കായലില്‍ ജോയ് ബ്രദേഴ്‌സ് പെട്രോള്‍ പമ്പിന്‍റെ സമീപത്തെ കടവില്‍ ആണ് കമല്‍ മാലോയുടെ മൃതദേഹം കണ്ടെത്തിയിരുന്നു. ഊരും പേരും തിരിച്ചറിയാതെ വന്നതോടെ മുനമ്പം പൊലിസ് നടത്തിയ അന്വേഷണത്തിലാണ് മരിച്ചയാളെ തിരിച്ചറിഞ്ഞതും കൊലപാതകം ആണെന്ന് സൂചന ലഭിച്ചതും.

സെപ്റ്റംബര്‍ നാലിന് രാത്രി ഇരുവരും ബോട്ടില്‍ വച്ച് പ്രതിയുടെ പുറത്തു നിന്നുള്ള ചില കൂട്ടുകാരുമായി മദ്യസേവ നടത്തിയിരുന്നു. ഇതിനിടെ ഭക്ഷണത്തെ സംബന്ധിച്ച് ഉണ്ടായ തര്‍ക്കം അടിപിടിയിലെത്തുകയും കമാല്‍ മാലോ കായലില്‍ വീണു മുങ്ങിപ്പോവുകയുമായിരുന്നു. ഇതിനു ശേഷം പ്രതി പശ്ചിമ ബംഗാളിലേക്ക് കടന്നുകളയുകയായിരുന്നു.

മൊബൈല്‍ ഫോണ്‍ കേന്ദ്രീകരിച്ച് നടത്തിയ അന്വേഷണത്തില്‍ പ്രതി പശ്ചിമ ബംഗാളില്‍ ഉണ്ടെന്ന് അറിയുകയും പൊലിസ് സംഘം അവിടെയെത്തി ബംഗ്ലാദേശ് അതിര്‍ത്തിയോട് ചേര്‍ന്ന ഇന്ത്യന്‍ ഗ്രാമത്തില്‍ നിന്നും പ്രതിയെ അറസ്റ്റ് ചെയ്യുകയായിരുന്നു. തുടര്‍ന്ന് പ്രദേശത്തെ കോടതിയില്‍ ഹാജരാക്കിയ ശേഷം പ്രതിയെയും കൊണ്ട് ചൊവ്വാഴ്ച രാത്രി പൊലിസ് മുനമ്പം സ്റ്റേഷനിലെത്തി.

പ്രതി കുറ്റം സമ്മതിച്ചതിനെ തുടര്‍ന്ന് അറസ്റ്റ് രേഖപ്പെടുത്തി. ഇന്ന് കോടതിയില്‍ ഹാജരാക്കും. മുനമ്പം എസ്എച്ച്ഒ, എസ്‌ഐ പി.എ. ശ്രീജിത്ത്, സീനിയര്‍ സിപിഒ പി.എ. അനൂപ്, കെ.പി. അഭിലാഷ്, സി.എസ്. ശ്രീജിത്ത് എന്നിവരാണ് അന്വേഷണംസംഘത്തില്‍ ഉണ്ടായിരുന്നത്

Related Articles

Leave a Reply

Your email address will not be published. Required fields are marked *

Back to top button