ബെംഗളുരു: ബെംഗളുരുവിന് സമീപം രാംനഗരയില് വാഹനാപകടം. വയനാട്, കാസര്കോട് സ്വദേശികളായ രണ്ട് യുവാക്കളാണ് മരിച്ചത്. 37കാരനായ കാസര്കോട് വെള്ളരിക്കുണ്ട് സ്വദശി സുബില് പി ടി, 36കാരനായ വയനാട് സ്വദേശി അജിത്ത് എന്നിവരാണ് മരിച്ചത്. ഇവര് ബെംഗളുരുവിലേക്കുള്ള യാത്രയിലായിരുന്നു. ഇരുവരും സഞ്ചരിച്ച പിക്കപ്പ് വാന് നിയന്ത്രണം വിട്ട് ഡിവൈഡറില് ഇടിക്കുകയായിരുന്നു.
മൃതദേഹങ്ങള് ആശുപത്രിയിലേക്ക് മാറ്റി. വിവരമറിഞ്ഞ് ബന്ധുക്കളും സുഹൃത്തുക്കളും രാംനഗരയിലേക്ക് തിരിച്ചിട്ടുണ്ട്. പോസ്റ്റ്മോര്ട്ടം അടക്കം നിയമനടപടികള് പൂര്ത്തീകരിച്ച ശേഷം മൃതദേഹങ്ങള് ബന്ധുക്കള്ക്ക് വിട്ടുകൊടുക്കും. വാഹനമോടിച്ചയാള് ഉറങ്ങിപ്പോയതാണ് അപകടത്തിന് ഇടയാക്കിയതെന്നാണ് പ്രാഥമിക നിഗമനം. സംഭവത്തില് പൊലീസ് കേസെടുത്തിട്ടുണ്ട്
ഒരു മാസം മുമ്പ് ബെംഗളുരു – മൈസൂര് ഹൈവേയ്ക്ക് സമീപം ചന്നപ്പേട്ടയില് സ്വകാര്യബസ് അപകടത്തില്പ്പെട്ട് നാല് മലയാളികള് മരിച്ചിരുന്നു. കൊയിലാണ്ടി സ്വദേശി 22കാരനായ മുഹമ്മദ് ഫര്ഹാന്, മാഹി സ്വദേശിയായ 27കാരന് സക്കീര്, 45വയസുള്ള റാഫീസ്, റഷീദ് എന്നിവരാണ് മരിച്ചത്. മറ്റ് യാത്രക്കാര്ക്ക് നിസാരപരിക്കുകളോടെ രക്ഷപ്പെട്ടു. 32 പേരാണ് ബസില് ഉണ്ടായിരുന്നത്. ഡ്രൈവര് ഉറങ്ങിപ്പോയതാണ് അപകടകാരണം
