ലൂസിയാന: ഭാര്യയോട് വഴക്കടിച്ച് ഒരു വയസ് മാത്രമുള്ള മകളുമായി കാറിൽ പാഞ്ഞ് പോയ ഭർത്താവിനേക്കുറിച്ച് ഭാര്യ പൊലീസിന് വിവരം നൽകി. പൊലീസ് പിന്തുടരുന്നതായി വ്യക്തമായതിന് പിന്നാലെ സെമിത്തേരിയിലേക്ക് കാർ ഇടിച്ച് കയറ്റി മകളെ കൊലപ്പെടുത്തിയതിന് പിന്നാലെ ജീവനൊടുക്കി 23കാരൻ. അമേരിക്കയിലെ ലൂസിയാനയിലെ കോൺവെന്റിലാണ് സംഭവം.
ബുധനാഴ്ചയാണ് കോൺവെന്റിലെ സെന്റ് ജെയിംസ് പാരീഷ് ദേവാലയത്തിന്റെ സെമിത്തേരിയിൽ 1 വയസുകാരി കൊല്ലപ്പെട്ടത്. സ്വയം വെടിയുതിർത്ത യുവാവിനെ പിന്തുടർന്നെത്തിയ പൊലീസ് ആശുപത്രിയിലെത്തിച്ചെങ്കിലും ചികിത്സ പുരോഗമിക്കുന്നതിനിടെ മരണപ്പെടുകയായിരുന്നു. ബുധനാഴ്ച ഉച്ച കഴിഞ്ഞ് 2 മണിയോടെയാണ് പൌലിനയിലെ ഒരു വീട്ടിൽ നിന്ന് ഒരു വയസുകാരിയുടെ അമ്മ പൊലീസുമായി ബന്ധപ്പെടുന്നത്. ഭർത്താവ് വഴക്കിട്ട് പുറത്ത് പോയിട്ട് ഏറെ നേരമായെന്നും വിവരം അറിയാൻ കഴിയുന്നില്ലെന്നും വിവരം തിരക്കാമോയെന്നുമായിരുന്നു യുവതിയുടെ ആവശ്യം.