തിരുവനന്തപുരം: കൃത്യസമയത്ത് ജോലിക്കെത്താൻ ഒരു ബസ് വിട്ട് നൽകണമെന്ന ആവശ്യവുമായി സർക്കാർ ജീവനക്കാർ. ഇതുമായി ബന്ധപ്പെട്ട് ഗതാഗത മന്ത്രി ഗണേഷ് കുമാറിന് നിവേദനം നൽകാൻ കാത്തിരിക്കുകയാണ് തിരുവനന്തപുരത്തെ ഒരു കൂട്ടം സർക്കാർ ജീവനക്കാർ. നെയ്യാറ്റിൻകര ഡിപ്പോയിൽ നിന്ന്‌ കുടപ്പനക്കുന്ന്‌ സിവിൽ സ്റ്റേഷനിലേക്ക് രാവിലെയും വൈകിട്ടും ബസ് അനുവദിക്കണമെന്നാണ് ഇവരുടെ ആവശ്യം.
യാത്രക്കാർ കൂടുതലുള്ള റൂട്ടിൽ ആവശ്യത്തിന് ബസ് ഇല്ലാത്തത് യാത്രക്കാരെ ഏറെ ദുരിതത്തിലാക്കുകയാണ്. നെയ്യാറ്റിൻകര, വഴുതക്കാട്, ശാസ്തംമംഗലം, എസ് എ പി ക്യാമ്പ് വഴി സിവിൽ സ്റ്റേഷനിലേക്കുള്ള സർവ്വീസുകൾ ഇതുവരെ പുനഃസ്ഥാപിച്ചിട്ടില്ല. അതുകൊണ്ട് തന്നെ ഈ പ്രദേശത്തെ യാത്രക്കാർ മൂന്ന് ബസ് മാറി കയറിയാണ് ഓഫീസുകളിലേക്ക് എത്തുന്നത്.
‘വൈകിട്ട്‌ 5.20ന്‌ ബസ് സിവിൽ സ്‌റ്റേഷനിൽ നിന്ന്‌ പുറപ്പെട്ടാൽ വൈകിട്ട്‌ ഏഴോടെ നെയ്യാറ്റിൻകര ഡിപ്പോയിൽ തിരിച്ചെത്താനാകും. ഏപ്രിലിൽ ഗതാഗത മന്ത്രിക്ക് പരാതി നൽകിയത് കൊണ്ട് ഒരാഴ്ച്ച ഈ റൂട്ടിലൂടെ ബസ് കൃത്യമായി സർവീസ് നടത്തിയിരുന്നു. എന്നാൽ വീണ്ടും പഴയത് പോലെയായി. അതുകൊണ്ട് ജീവനക്കാർ വീണ്ടും ആവശ്യവുമായി രംഗത്ത് വന്നത്’. ജീവനക്കാർ പറഞ്ഞു.