കേളകം: ചീങ്കണ്ണി പുഴയുടെ വളയംച്ചാൽ മുതൽ അടയ്ക്കാത്തോട് വരെയുള്ള ഭാഗം സർവ്വേ ചെയ്യാൻ എന്നപേരിൽ എത്തിയ റവന്യൂ അധികൃതർ നടപടികൾ ആരംഭിക്കാൻ കഴിയാതെ ഇന്നും മടങ്ങി. പഞ്ചായത്തിന്റേയും നാട്ടുകാരുടെയും ഇടപെടൽ മൂലമാണ് സർവ്വേ നടത്താതെ അധികൃതർ മടങ്ങിയത്.
പഞ്ചായത്തിനേയോ ജനങ്ങളേയോ വിവരം ഔദ്യോഗികമായി അറിയിക്കാതെയായിരുന്നു ഇന്നലെയും ഇന്നുമായി റവന്യൂ അധികൃതർ സർവേക്കെത്തിയത്. അപ്രതീക്ഷിത സർവേയിൽ ദുരൂഹത ആരോപിച്ച് ഇന്നലെ തന്നെ നാട്ടുകാർ പ്രതിഷേധവുമായി രംഗത്തെത്തിയിരുന്നു. ഔദ്യോഗികമായി യാതൊരുവിധ വിവരങ്ങളും ലഭിച്ചിട്ടില്ലെന്ന് പഞ്ചായത്ത് അധികൃതരും ഇന്നലെ തന്നെ വ്യക്തമാക്കിയിരുന്നു.ഇതിൻറെ തുടർച്ചയായാണ് ഇന്നും സർവേക്കെത്തിയ റവന്യൂ വകുപ്പ് ഉദ്യോഗസ്ഥരെ നാട്ടുകാർ തടഞ്ഞത്.