ലക്നൗ ∙ ഉത്തർപ്രദേശിൽ മോഷണക്കുറ്റം ആരോപിച്ച് പ്രായപൂർത്തിയാകാത്ത രണ്ടു കുട്ടികൾക്കു ക്രൂര മർദനം. സിദ്ധാർഥ് നഗറിലെ പത്തും പതിനഞ്ചും വയസ്സുള്ള രണ്ട് ആൺകുട്ടികളെ മൂത്രം കുടിപ്പിക്കുകയും സ്വകാര്യഭാഗങ്ങളിൽ മുളക് അരച്ചു തേക്കുകയും ചെയ്തു. ബലംപ്രയോഗിച്ച് ചില അജ്ഞാത കുത്തിവയ്പ്പുകൾ എടുത്തതായും റിപ്പോർട്ടുണ്ട്. ഇതിന്റെ ഞെട്ടിക്കുന്ന ദൃശ്യങ്ങൾ പുറത്തുവന്നു. സംഭവവുമായി ബന്ധപ്പെട്ട് ആറു പേരെ പൊലീസ് കസ്റ്റഡിയിലെടുത്തു.
കുട്ടികളെ കെട്ടിയിട്ട് ക്രൂരമായി മർദിക്കുന്നതിന്റെ വിഡിയോയാണ് പുറത്തുവന്നത്. പച്ചമുളക് കഴിക്കാൻ കുട്ടികളെ നിർബന്ധിക്കുന്നതും അത് വിഴുങ്ങുന്നതിനായി മൂത്രം നൽകിയെന്നുമാണ് ദേശീയ മാധ്യമങ്ങൾ പറയുന്നത്. ഇക്കാര്യം നിരസിച്ച കുട്ടികളെ ക്രൂരമായ ആക്രമണത്തിനും ഇരയാക്കി. കൈ പുറകിൽ കെട്ടി മുഖം തറയിൽ അമർത്തി ഉരയ്ക്കുകയും ചെയ്യുന്നുണ്ട്. കുട്ടികൾ ഇട്ടിരുന്ന ട്രൗസർ ഊരിമാറ്റി പച്ചമുളക് അരച്ചു തേക്കുകയും ചെയ്തു.സിദ്ധാർഥ് നഗറിലെ പാത്ര ബസാർ പൊലീസ് സ്റ്റേഷൻ പരിധിയിലെ അർഷാൻ ചിക്കൻ കടയിൽനിന്ന് ഓഗസ്റ്റ് നാലിനാണ് വിഡിയോ ചിത്രീകരിച്ചിരിക്കുന്നത്. വിഡിയോ സമൂഹമാധ്യമത്തിൽ പ്രചരിച്ചതോടെ പൊലീസ് കേസെടുത്ത് അന്വേഷണം ആരംഭിക്കുകയായിരുന്നു