കണ്ണൂർ: മഴ കനത്തതോടെ ചക്കരക്കൽ ടൗണിൽ ഗതാഗത കുരുക്ക് അതിരൂക്ഷമായി. ചക്കരക്കൽ ടൗണിലെ അനധികൃത പാർക്കിങ്ങും പച്ചക്കറി ഇറക്കാൻ വരുന്ന ചരക്കുലോറികളുമാണ് ഗതാഗത തടസമുണ്ടാക്കുന്നത്. ഇതുകാരണം രാവിലെ ഒൻപതര മുതൽ കനത്ത ഗതാഗത കുരുക്കാണ് ചക്കരക്കൽ നഗരത്തിൽ അനുഭവപെടുന്നത്.
ഈ സമയങ്ങളിൽ ഹോംഗാർഡോ പൊലിസോ സ്ഥലത്തുണ്ടാവാറില്ലെന്ന് പ്രദേശവാസികൾ പറയുന്നു. നേരത്തെ ചക്കരക്കൽ ടൗണിൽ ജന തിരക്കേറിയ സമയങ്ങളിൽ പച്ചക്കറി ലോഡുകൾ ഇറക്കരുതെന്ന നിർദ്ദേശം പൊലിസ് പുറപ്പെടുവിപ്പിച്ചിരുന്നു. ഇതേ തുടർന്ന് ഗതാഗത കുരുക്കിന് അൽപം ശമനമുണ്ടായെങ്കിലും വീണ്ടും പഴയപടിയായിരിക്കുകയാണ്.