ഇന്നലെ ഉദ്ഘാടനം ചെയ്ത കൊച്ചി വാട്ടര് മെട്രോയുടെ പൊതുജനങ്ങള്ക്കുള്ള സര്വീസ് ഇന്ന് ആരംഭിക്കും. ഹൈക്കോടതി-വൈപ്പിന് സര്വീസാണ് ഇന്ന് തുടങ്ങുക. രാവിലെ ഏഴിന് ഹൈക്കോടതി വാട്ടര് മെട്രോ ടെര്മിനലില് നിന്നും വൈപ്പിന് വാട്ടര് മെട്രോ ടെര്മിനലില് നിന്നും ബോട്ടുകള് സര്വീസ് ആരംഭിക്കും. 20 രൂപയാണ് ഈ റൂട്ടിലെ ടിക്കറ്റ് നിരക്ക്. തിരക്കുള്ള സമയങ്ങളില് ഹൈക്കോടതി-വൈപ്പിന് റൂട്ടില് ഓരോ 15 മിനിറ്റിലും ബോട്ട് സര്വീസ് ഉണ്ടാകും. രാത്രി എട്ടുവരെ സര്വീസ് തുടരും. വൈപ്പിന് വാട്ടര് മെട്രോ ടെര്മിനലില് നിന്ന് വൈപ്പിന് ദ്വീപ് നിവാസികള്ക്കൊപ്പം ആദ്യ ബോട്ട് സര്വീസില് എംഡി ലോക്നാഥ് ബെഹ്റയും ഇന്ന് രാവിലെ ചേരും.